កីឡាករ អាជ្ញាកណ្តាល និងក្រុមជម្រើសជាតិជាច្រើន បានរងការគំរាមកំហែង និងការយាយីពេញមួយព្រឹត្តិការណ៍ World Cup 2026 ដោយ Lionel Messi គឺជាកីឡាករដែលទទួលការគំរាមកំហែងច្រើនជាងគេ។

 

យោងតាមឯកសាររបស់ International Police Cooperation Center (IPCC) ដែលជាអង្គភាពសហការជាមួយ FBI បានឱ្យដឹងថា ការប្រកួត World Cup ឆ្នាំនេះបានជួបប្រទះនូវចំនួនការគំរាមកំហែងដែលមិនធ្លាប់មានពីមុន។ កាសែតអេស្ប៉ាញ Información បានទទួលឯកសារដែលរៀបរាប់លម្អិតអំពីការយាយីទៅលើកីឡាករ និងមន្ត្រី។

 

Messi ទទួលការគំរាមកំហែងច្រើនបំផុត

 

របាយការណ៍បង្ហាញថា Messi បានទទួលការគំរាមកំហែងច្រើនបំផុត មុនពេល និងអំឡុងពេល World Cup។

ករណីមួយដែលធ្ងន់ធ្ងរបំផុត បានកើតឡើងនៅពេលមនុស្សម្នាក់បានទូរស័ព្ទទៅអាកាសយានដ្ឋាន Dallas ហើយអះអាងថា ខ្លួន និងមនុស្សពីរនាក់ទៀតកំពុងធ្វើដំណើរទៅកាន់កីឡដ្ឋាន ដោយមាន គ្រាប់បែកផលិតដោយខ្លួនឯង និងកាំភ្លើង AR-15 ហើយមានបំណងវាយប្រហារទៅលើតារាអាហ្សង់ទីនរូបនេះ។

 

ក្នុងការប្រកួតមួយទៀតនៅទីក្រុង Atlanta អ្នកប្រើប្រាស់ម្នាក់នៅលើ X បានបង្ហោះថា ខ្លួនកំពុងចូលទៅក្នុងកីឡដ្ឋាន ហើយមានបំណងបំផ្ទុះ Messi ដោយមានគ្រាប់បែកចំនួន 4 គ្រាប់ចងជាប់នឹងខ្លួន។

 

ជាការឆ្លើយតបចំពោះការគំរាមកំហែងនេះ អាជ្ញាធរត្រូវបានបង្ខំឱ្យបញ្ជូន ក្រុមជំនាញកម្ចាត់គ្រាប់បែក និងក្រុមសត្វឆ្កែ K-9 ដើម្បីត្រួតពិនិត្យកីឡដ្ឋានទាំងមូលយ៉ាងលម្អិត។

 

Ronaldo ទាក់ទាញអ្នកគាំទ្រជ្រុលនិយមច្រើនបំផុត

 

Cristiano Ronaldo គឺជាកីឡាករដែលត្រូវបានតាមដាន និងផ្តោតការចាប់អារម្មណ៍ខ្លាំងបំផុតពីអ្នកគាំទ្រដែលមានអាកប្បកិរិយាជ្រុលនិយម និងឈ្លក់វង្វេង។

 

នៅទីក្រុង Houston និង Toronto ប៉ូលិសបានឃាត់ខ្លួនមនុស្សជាច្រើននាក់ដែលព្យាយាមចូលទៅជិតតារាព័រទុយហ្គាល់។ ក្នុងករណីខ្លះ ពួកគេបានលួចចូលក្នុងជណ្តើរយន្ត និងតំបន់ដែលមិនអនុញ្ញាតឱ្យមនុស្សទូទៅចូល។

 

ក្នុងការប្រកួតដែលមានការទន្ទឹងរង់ចាំខ្លាំងរវាង ព័រទុយហ្គាល់និង ក្រូអាត អ្នកគាំទ្រម្នាក់ដែលពាក់អាវ Ronaldo ថែមទាំងបានរត់ចូលទីលាន ដើម្បីព្យាយាមទៅជិត Ronaldo។

 

Mbappé ក៏រងការយាយីធ្ងន់ធ្ងរ

 

Kylian Mbappé ក៏ក្លាយជាគោលដៅសំខាន់នៃការយាយីផងដែរ។

 

ខ្សែប្រយុទ្ធបារាំងរូបនេះបានរងការប្រមាថបែប រើសអើងជាតិសាសន៍ និងជនបរទេស បន្ទាប់ពីមានការប៉ះទង្គិចជាមួយអ្នកចាំទីប៉ារ៉ាហ្គាយ Orlando Gill។

 

អ្នកគាំទ្រមួយចំនួននៅប៉ារ៉ាហ្គាយថែមទាំងបានដុតរូបតំណាងធ្វើពីក្រណាត់ដែលមានរូបរាងដូច Mbappé ហើយបង្ហោះវីដេអូនៅលើបណ្តាញសង្គម។

 

កីឡាករផ្សេងទៀតក៏ទទួលការគំរាមសម្លាប់

 

កីឡាករជាច្រើននាក់ទៀតបានទទួលការគំរាមកំហែងធ្ងន់ធ្ងរ បន្ទាប់ពីធ្វើកំហុសក្នុងការប្រកួត រួមមាន៖

Alexander Sørloth (ន័រវែស) — រងការរិះគន់យ៉ាងខ្លាំង បន្ទាប់ពីមិនបានបញ្ជូនបាល់ឱ្យ Erling Haaland ក្នុងឱកាសមួយទល់មួយ ដែលបានរួមចំណែកដល់ការចាញ់អង់គ្លេស 1-2 ក្នុងវគ្គ 8 ក្រុមចុងក្រោយ។

 

Jaminton Campaz (កូឡុំប៊ី) — ខកខានឱកាសស៊ុតបញ្ចូលទីដ៏ច្បាស់លាស់ ក្នុងការចាញ់ស្វីសនៅវគ្គ 16 ក្រុមចុងក្រោយ ហើយត្រូវបានរាយការណ៍ថា មានការភ័យខ្លាចក្នុងការត្រឡប់ទៅប្រទេសកូឡុំប៊ីវិញ។

 

Lucas Digne (France) — ទទួលការគំរាមកំហែងយ៉ាងធ្ងន់ធ្ងរ បន្ទាប់ពីការបង្កកំហុសលើ Lamine Yamal ដែលធ្វើឱ្យអេស្ប៉ាញទទួលបានបាល់ពិន័យ 11 ម៉ែត្រ ក្នុងការប្រកួតវគ្គពាក់កណ្តាលផ្តាច់ព្រ័ត្រ ដែលបារាំងចាញ់អេស្ប៉ាញ 0-2។

 

អាជ្ញាកណ្តាលក៏មិនរួចផុតពីការគំរាមកំហែង

 

ករណីធ្ងន់ធ្ងរបំផុតមួយពាក់ព័ន្ធនឹងអាជ្ញាកណ្តាលបារាំង François Letexier។

លោកបានទទួលសារគំរាមកំហែងជាង 6,000 សារ តាម WhatsApp បន្ទាប់ពីកាត់សេចក្តីការប្រកួតរវាង Argentina និង Egypt នៅវគ្គ 16 ក្រុមចុងក្រោយ។

ដោយសារកម្រិតនៃការគំរាមកំហែង ប៉ូលិសត្រូវផ្តល់ការការពារដល់ គ្រួសារ និងផ្ទះរបស់លោកនៅប្រទេសបារាំង។

 

ជំនួយការអាជ្ញាកណ្តាល VAR Willy Delajod ក៏ទទួលបានការគំរាមកំហែងជាច្រើនផងដែរ។

 

ក្រុមជម្រើសជាតិកូរ៉េខាងត្បូងត្រូវការការការពារ

 

ក្រុមជម្រើសជាតិ កូរ៉េខាងត្បូង ក៏ត្រូវការការអមការពារពីប៉ូលិស ដើម្បីចាកចេញពីសហរដ្ឋអាមេរិកដោយសុវត្ថិភាព។

 

នេះកើតឡើងបន្ទាប់ពីក្រុមទទួលបាន ការគំរាមសម្លាប់ ក្រោយការបរាជ័យដ៏ខកចិត្ត និងការធ្លាក់ចេញពី World Cup នៅវគ្គចែកពូល៕