Cristiano Ronaldo និង Georgina Rodríguez ត្រូវបានរាយការណ៍ថា បានចុះកិច្ចព្រមព្រៀងមុនរៀបការ (Pre-nup) មួយថ្ងៃមុនពេលពួកគេរៀបការជាសម្ងាត់។

គូស្នេហ៍មួយគូនេះបានរៀបការក្នុងពិធីតូច និងស្និទ្ធស្នាល នៅវិមានប្រណីតតម្លៃប្រមាណ 30 លានផោន របស់ពួកគេ ក្នុងតំបន់លំនៅដ្ឋានលំដាប់ខ្ពស់ Quinta da Marinha ក្នុងទីក្រុង Cascais ប្រទេសព័រទុយហ្គាល់។

សូម្បីតែម្តាយរបស់ Ronaldo គឺ Dolores ក៏មិនបានចូលរួមដែរ។ មានតែសាក្សីចំនួន 4 នាក់ និងកូនៗរបស់ពួកគេប៉ុណ្ណោះដែលត្រូវបានអញ្ជើញ។

Ronaldo អាយុ 41 ឆ្នាំ និង Georgina អាយុ 32 ឆ្នាំ បានមានទំនាក់ទំនងស្នេហាជាមួយគ្នារយៈពេល 10 ឆ្នាំ ចាប់តាំងពីពួកគេបានជួបគ្នានៅហាង Gucci ក្នុងទីក្រុង Madrid ដែល Georgina ធ្លាប់ធ្វើការ។

ចុះកិច្ចព្រមព្រៀងមុនរៀបការ

ទោះបីពិធីរៀបការត្រូវបានរក្សាជាសម្ងាត់ក៏ដោយ រូបភាពឯកសារវិញ្ញាបនបត្រអាពាហ៍ពិពាហ៍របស់ពួកគេត្រូវបានផ្សព្វផ្សាយ។

ឯកសារនោះបង្ហាញថា Ronaldo និង Georgina បានចុះកិច្ចព្រមព្រៀងមុនរៀបការនៅការិយាល័យសារការីសាធារណៈមួយក្នុងទីក្រុង Lisbon នៅថ្ងៃទី 10 ខែសីហា គឺមួយថ្ងៃមុនពេលពួកគេរៀបការ។

ក្នុងឯកសារ ពួកគេបានព្រមព្រៀងក្នុងការបែងចែកទ្រព្យសម្បត្តិដាច់ដោយឡែកពីគ្នា។

នោះមានន័យថា ប្រសិនបើទំនាក់ទំនងរបស់ពួកគេបញ្ចប់ Georgina មិនមានសិទ្ធិទទួល ពាក់កណ្តាលនៃទ្រព្យសម្បត្តិទាំងអស់ដែលរកបានក្នុងអំឡុងពេលរៀបការ ដោយស្វ័យប្រវត្តិនោះទេ។

ជំនួសមកវិញ ទ្រព្យសម្បត្តិនីមួយៗនឹងជាកម្មសិទ្ធិរបស់អ្នកដែលរកបាន ឬទិញវា។

ប្រសិនបើមានការលែងលះ Ronaldo និង Georgina នឹងរក្សាទ្រព្យសម្បត្តិដែលចុះឈ្មោះក្នុងឈ្មោះរៀងៗខ្លួន ខណៈទ្រព្យសម្បត្តិដែលចុះឈ្មោះក្នុងឈ្មោះរបស់អ្នកទាំងពីរ នឹងត្រូវចែករំលែកគ្នា។

ទ្រព្យសម្បត្តិដ៏មហាសាលរបស់ Ronaldo

Ronaldo ត្រូវបានរាយការណ៍ថា បានឈានដល់ទ្រព្យសម្បត្តិប្រមាណ 1 ពាន់លាន នៅដើមឆ្នាំនេះ។

អាណាចក្រអាជីវកម្មរបស់គាត់រួមមាន៖
សណ្ឋាគារ
ក្លឹបហាត់ប្រាណ
ក្លឹប Padel
ម៉ាកសម្លៀកបំពាក់ផ្ទាល់ខ្លួន
ស្ទូឌីយោផលិតភាពយន្ត
រថយន្តប្រណីតតម្លៃប្រមាណ 22 លាន
អចលនទ្រព្យប្រណីតតម្លៃជាង 60 លានផោន
យន្តហោះឯកជន
ទូកប្រណីត
លើសពីនេះ គាត់ក៏ទទួលប្រាក់ឈ្នួលដ៏មហាសាលពីក្លឹប Al-Nassr ប្រមាណ 488,000ផោន ក្នុងមួយថ្ងៃ។

កិច្ចព្រមព្រៀងមុនរៀបការនេះត្រូវបានគេនិយាយថា មានគោលបំណងការពារ និងបែងចែកទ្រព្យសម្បត្តិដែល Ronaldo មានស្រាប់ ព្រមទាំងប្រាក់ចំណូលដែលគាត់នឹងរកបាននាពេលអនាគត។

Georgina ក៏មានអាជីវកម្មផ្ទាល់ខ្លួន

Georgina Rodríguez ក៏មានប្រភពចំណូលផ្ទាល់ខ្លួនជាច្រើនដែរ ដូចជា៖
ការងារជាតារាបង្ហាញម៉ូដ
ការសម្ដែង
ម៉ាកម៉ូដផ្ទាល់ខ្លួន
បណ្តាញសង្គម និងការផ្សព្វផ្សាយពាណិជ្ជកម្ម។

85,000ផោន ក្នុងមួយខែ ប្រសិនបើលែងលះ?

យោងតាមព័ត៌មានដែលត្រូវបានរាយការណ៍ដោយប្រព័ន្ធផ្សព្វផ្សាយនៅប្រទេសព័រទុយហ្គាល់ និងត្រូវបាន Marca លើកយកមករាយការណ៍ដែរ កិច្ចព្រមព្រៀងនេះអាចផ្តល់ឱ្យ Georgina នូវប្រាក់ប្រមាណ 85,000ផោន ក្នុងមួយខែ ប្រសិនបើពួកគេចែកផ្លូវគ្នា។

ការព្រមព្រៀងនេះត្រូវបានគេនិយាយថា បានកំណត់ឡើងបន្ទាប់ពីកំណើតកូនស្រី Alana ដោយមានគោលបំណងធានាសុវត្ថិភាពផ្នែកហិរញ្ញវត្ថុរបស់ Georgina និងកូនៗ។

មានការអះអាងបន្ថែមថា វិមានប្រណីតតម្លៃប្រមាណ 5 លានផោន របស់ Ronaldo នៅតំបន់លំនៅដ្ឋានលំដាប់ខ្ពស់ La Finca ក្នុងទីក្រុង Madrid ត្រូវបានចុះឈ្មោះក្នុងឈ្មោះ Georgina។

ពិធីរៀបការជាសម្ងាត់

តំណាងរបស់ Ronaldo បានបញ្ជាក់នៅដើមសប្តាហ៍នេះថា Ronaldo និង Georgina បានរៀបការនៅថ្ងៃទី 11 ខែសីហា ក្នុងពិធីតូច និងស្និទ្ធស្នាលមួយនៅ Cascais។

មុននេះ អ្នកទាំងពីរបានបង្ហោះរូបភាពដៃពាក់ចិញ្ចៀនអាពាហ៍ពិពាហ៍នៅលើ Instagram របស់ពួកគេ។

មិនមានព័ត៌មានលម្អិតច្រើនអំពីទីតាំងពិតប្រាកដ ឬអ្នកដែលបានចូលរួមក្នុងពិធីនោះឡើយ ក្រៅពីការបញ្ជាក់ថា កូនៗរបស់ពួកគេបានចូលរួម។

បន្ទាប់មក កាសែតព័រទុយហ្គាល់ Jornal de Notícias បានបង្ហាញព័ត៌មានលម្អិតអំពីពិធីរៀបការ ដែលមានភ្ញៀវតិចបំផុត រហូតមានការរាយការណ៍ថា ម្តាយរបស់ Ronaldo គឺ Dolores មិនមានកន្លែងសម្រាប់ចូលរួមក្នុងពិធីនេះទេ៕