ខេត្តស្ទឹងត្រែង ៖ សមត្ថកិច្ចខេត្តស្ទឹងត្រែងកំពុងបើកការស្រាវជ្រាវយ៉ាងក្តៅគគុក ដើម្បីតាមស្វែងរកមុខសញ្ញា ជនដៃដល់ ក្នុងករណីឃាតកម្មសម្លាប់បុរសម្នាក់ ដោយវាយបំបែកក្បាល រួចចងភ្ជាប់នឹងដុំថ្មទម្លាក់ទឹកស្រះ ដើម្បីបំបាត់ភស្តុតាង ស្ថិតនៅក្នុងស្រុកថាឡាបរិវ៉ាត់។
យោងតាមប្រភពព័ត៌មានពីសមត្ថកិច្ចបានឱ្យដឹងថា កាលពីវេលាម៉ោង ២:០០ នាទីរសៀល ថ្ងៃទី១៤ ខែសីហា ឆ្នាំ២០២៦ កម្លាំងជំនាញព្រហ្មទណ្ឌនៃអធិការដ្ឋាននគរបាលស្រុកថាឡាបរិវ៉ាត់ បានសហការជាមួយកម្លាំងជំនាញព្រហ្មទណ្ឌនៃស្នងការដ្ឋាននគរបាលខេត្តស្ទឹងត្រែង បានចុះពិនិត្យសាកសពបុរសម្នាក់ ដែលត្រូវបានគេប្រទះឃើញស្លាប់នៅក្នុងស្រះទឹក ចំការស្វាយ
ចន្ទីរបស់ឈ្មោះ ប៉ាង ហៀម ស្ថិតនៅចំណុចប្រឡាយថ្ម ភូមិមន ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង។
ជនរងគ្រោះត្រូវបានស្គាល់អត្តសញ្ញាណឈ្មោះ រិន សារ៉ាត់ ភេទប្រុស អាយុ ៣៩ឆ្នាំ មុខរបរមិនពិតប្រាកដ និងមានទីលំនៅបច្ចុប្បន្ននៅក្នុងភូមិ-ឃុំកើតហេតុខាងលើ។
ប្រតិបត្តិការពិនិត្យកោសល្យវិច័យនេះ ត្រូវបានដឹកនាំផ្ទាល់ដោយវរសេនីយ៍ឯក ទិត្យ សុវណ្ណនី អនុផែន និងលោកវីរសេនីយ៍ឯក ដួង ស៊ីវុត្ថា នាយការិយាល័យនគរបាលព្រហ្មទណ្ឌកម្រិតធ្ងន់ ដោយមានការចូលរួមពីការិយាល័យជំនាញបច្ចេកទេសវិទ្យាសាស្ត្រ គ្រូពេទ្យមណ្ឌលសុខភាពឃុំអន្លង់ជ្រៃ អាជ្ញាធរដែនដី និងសាច់ញាតិជនរងគ្រោះ។
ផ្អែកតាមលទ្ធផលនៃការពិនិត្យជាក់ស្តែង សមត្ថកិច្ចបានរកឃើញថា សាកសពមានសភាពស្អុយរលួយនិងហើមខ្លាំង ដោយមានស្នាមបែកលលាដ៍ក្បាលផ្នែកខាងមុខ និងបែកផ្ទៃមុខរហូតដល់ចង្កា។ អ្វីដែលកត់សម្គាល់នោះ គឺនៅក្រោមសាកសពមានចងខ្សែនីឡុងភ្ជាប់ទៅនឹងដុំថ្មចំនួន ២ដុំ ដែលមានទម្ងន់សរុបប្រមាណជាង ១០គីឡូក្រាម នៅត្រង់ចង្កេះ និងមានកន្សែងរុំក.ថែមទៀតផង។
តាមការសន្និដ្ឋានបឋមរបស់ក្រុមការងារជំនាញ ករណីនេះគឺជា អំពើឃាតកម្ម ដោយជនល្មើសបានវាយសម្លាប់ជនរងគ្រោះនឹងវត្ថុរឹង រួចទម្លាក់ទឹកបំបាត់ភស្តុតាង។ប្រភពដដែលបានបន្តថា ជនរងគ្រោះបានបាត់ខ្លួនតាំង ពីអំឡុងថ្ងៃទី៧ ឬទី៨ ខែសីហា មកម្ល៉េះ ប៉ុន្តែសមត្ថកិច្ច និងអាជ្ញាធរមិនទាន់ទទួលបានព័ត៌មានភ្លាមៗនោះទេ រហូតដល់ថ្ងៃទី១៤ ខែសីហា ទើបមានប្រជាពលរដ្ឋប្រទះឃើញ រួចរាយការណ៍ជូនសមត្ថកិច្ចចុះពិនិត្យទីតាំងកើតហេតុតែម្តង។
ក្រោយបញ្ចប់ការកោសល្យវិច័យ កម្លាំងជំនាញបានធ្វើកំណត់ហេតុដកហូតវត្ថុតាងទៅរក្សាទុកនៅប៉ុស្តិ៍នគរបាលរដ្ឋបាលអន្លង់ជ្រៃជាបណ្តោះអាសន្ននិងបានរាយការណ៍ជូនលោក យ៉ុង សុកឃឿន ព្រះរាជអាជ្ញារងអមសាលាដំបូងខេត្ត។ ដោយមានការអនុញ្ញាតពីតំណាងអយ្យការ សពជនរងគ្រោះត្រូវបានប្រគល់ជូនគ្រួសារ ដើម្បីយកទៅធ្វើបុណ្យតាមប្រពៃណី។
បច្ចុប្បន្ន កម្លាំងសមត្ថកិច្ចជំនាញកំពុងបន្តស្រាវជ្រាវយ៉ាងយកចិត្តទុកដាក់ ដើម្បីតាមស្វែងរកអត្តសញ្ញាណ និងចាប់ខ្លួនជនដៃដល់ យកមកផ្តន្ទាទោសតាមផ្លូវច្បាប់ជាធរមាន៕
