ភ្នំពេញ ៖ បុរសម្នាក់បានបើករថយន្តម៉ាក highlander មួយគ្រឿងក្នុងល្បឿនលឿនទាំងស្ថានភាពស្រវឹងធ្វើឱ្យរេចង្កូតជ្រុលទៅបុកផ្ទប់ពីក្រោយរថយន្តម៉ាក ford ranger ដែលចតស្ងៀមលើចិញ្ចើមផ្លូវបណ្តាលឲ្យរងការខូចខាតហើយសំណាងល្អដែលមិនបង្កអោយមានគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង ៦:៥០នាទីយប់ថ្ងៃទី០៣ ខែកញ្ញា ឆ្នាំ២០២៦ ស្ថិតនៅតាមបណ្តោយផ្លូវ លេខ១០០៧ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តម៉ាកហាយឡេនឌ័រពណ៌ទឹកប្រាក់១គ្រឿងពាក់ផ្លាកលេខ ភ្នំពេញ 2AY- 6034 បើកបរដោយបុរសម្នាក់ធ្វើដំណើរតាមបណ្តោយផ្លូវ លេខ១០០៧ ក្នុងទិសដៅពីជើងទៅត្បូងដោយល្បឿនលឿនទាំងស្ថានភាពស្រវឹងរួចក៏រេចង្កូតជ្រុលទៅបុកផ្ទប់ពីក្រោយរថយន្តម៉ាក ford ranger ពណ៌ខ្មៅ ពាក់ផ្លាកលេខភ្នំពេញ 2BY-0732 ដែលឈប់ចតលើចិញ្ចើមផ្លូវរងការខូចខាតយ៉ាងដំណំ តែសំណាងល្អមិនមានគ្រោះថ្នាក់ដល់មនុស្ស ភ្លាមៗនោះម្ចាស់រថយន្តបង្កហេតុបានគេចចេញពីកន្លែងកើតហេតុបាត់ស្រមោល។
ក្រោយកើតហេតុសមត្ថកិច្ចមូលដ្ឋានសហការជាមួយមន្រ្តីជំនាញបានចុះមកវាស់វែងស្ទូចយករថយន្តទាំង២គ្រឿងទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំការដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
