ក្រសួងការពារជាតិរុស្ស៊ីបាននិយាយថា យន្តហោះទម្លាក់គ្រាប់បែកយុទ្ធសាស្ត្រ Tu-95 មួយគ្រឿងបានធ្លាក់ក្នុងអំឡុងពេលហោះហើរហ្វឹកហាត់នៅខេត្ត Amur នៃចុងបូព៌ារុស្ស៊ី ដោយបានសម្លាប់សមាជិកក្រុមនាវិក ៦ នាក់ និងរបួសម្នាក់។ ក្រសួងបាននិយាយថា សមាជិកក្រុមនាវិកដែលរងរបួសត្រូវបានបញ្ជូនទៅមណ្ឌលសុខភាព។

ក្រសួងការពារជាតិរុស្ស៊ីបានបន្ថែមថា យន្តហោះនេះគ្មានអាវុធ ហើយបានធ្លាក់នៅក្នុងតំបន់ដែលគ្មានមនុស្សរស់នៅ។ គណៈកម្មការនៃកងកម្លាំងអវកាសរុស្ស៊ីត្រូវបានបញ្ជូនទៅកន្លែងកើតហេតុដើម្បីស៊ើបអង្កេតមូលហេតុនៃគ្រោះថ្នាក់នេះ។
យោងតាមប្រព័ន្ធផ្សព្វផ្សាយរុស្ស៊ី ក្រុមនាវិកហាក់ដូចជាបានព្យាយាមបញ្ជាយន្តហោះឱ្យឆ្ងាយពីតំបន់ដែលមានមនុស្សរស់នៅមុនពេលវាធ្លាក់។
យន្តហោះ Tu-95 គឺជាយន្តហោះទម្លាក់គ្រាប់បែកយុទ្ធសាស្ត្ររយៈចម្ងាយឆ្ងាយដែលបានចូលបម្រើការងារជាមួយកងទ័ពអាកាសសូវៀតក្នុងឆ្នាំ ១៩៥៦។ រហូតមកដល់សព្វថ្ងៃនេះ យន្តហោះ Tu-95 នៅតែជាយន្តហោះផ្ទុកមីស៊ីលយុទ្ធសាស្ត្រដ៏សំខាន់មួយរបស់កងទ័ពអាកាសរុស្ស៊ី។ យោងតាមការប៉ាន់ស្មានបច្ចុប្បន្ន គិតត្រឹមឆ្នាំ ២០២៣ រុស្ស៊ីមានយន្តហោះទម្លាក់គ្រាប់បែក Tu-95MS ចំនួន ៤៥ គ្រឿង និងយន្តហោះ Tu-95MSM ចំនួន ១៨ គ្រឿងដែលបានធ្វើទំនើបកម្ម។
យន្តហោះ Tu-95MSM ជំនាន់ថ្មីដែលធ្វើឱ្យប្រសើរឡើងមានសមត្ថភាពផ្ទុកមីស៊ីលបញ្ជាទិស Kh-101 ជំនាន់ថ្មី ខណៈដែលជំនាន់ចាស់ៗត្រូវបានបំពាក់ដោយមីស៊ីលបញ្ជាទិស Kh-55 និង Kh-555 សម័យសូវៀត។
យន្តហោះ Tu-95 ត្រូវបានរចនាឡើងដើម្បីវាយប្រហារគោលដៅយុទ្ធសាស្ត្រគ្រប់ស្ថានភាពអាកាសធាតុ និងគ្រប់ពេលវេលា៕

រូបថត​: tuoitre