ដំឡូងជ្វា ចេក ស៊ុតស្ងោរ និងកាហ្វេខ្មៅ អាចរៀបចំជាអាហារពេលព្រឹកដែលល្អសម្រាប់ថ្លើម ហើយអាចជួយកាត់បន្ថយការរលាក គាំទ្រការគ្រប់គ្រងទម្ងន់ និងកាត់បន្ថយហានិភ័យនៃជំងឺសរសៃជាលិកាថ្លើម (liver fibrosis)។ នេះបើតាមការណែនាំរបស់វេជ្ជបណ្ឌិតផ្នែកក្រពះពោះវៀន និងថ្លើម Chien Cheng-hung ជនជាតិតៃវ៉ាន់។

 

ក្នុងកម្មវិធីទូរទស្សន៍មួយនាពេលថ្មីៗនេះ លោក Chien ដែលជាវេជ្ជបណ្ឌិតនៅផ្នែក Gastroenterology and Hepatology នៃមន្ទីរពេទ្យ Keelung Chang Gung Memorial Hospital ក្នុងកោះតៃវ៉ាន់ បានណែនាំឱ្យប្រកាន់ខ្ជាប់របបអាហារបែប Mediterranean ដើម្បីលើកកម្ពស់សុខភាពទូទៅ។

 

សម្រាប់អាហារពេលព្រឹក លោកបានណែនាំអាហារ ៤ មុខ រួមមាន ដំឡូងជ្វាដែលបានទុកឱ្យត្រជាក់ ចេកដែលសំបកមិនទាន់មានចំណុចខ្មៅ ស៊ុតស្ងោរ និងកាហ្វេខ្មៅ នេះបើតាមសារព័ត៌មាន SETN។

 

លោក Chien បានពន្យល់ថា ការទុកដំឡូងជ្វាដែលបានចម្អិនឱ្យត្រជាក់ អាចបង្កើនបរិមាណ ម្សៅធន់ (resistant starch) ដែលអាចធ្វើឱ្យការស្រូបយកជាតិស្ករយឺតជាងមុន។ លោកក៏បានណែនាំឱ្យជ្រើសរើសចេកដែលមិនទាន់ទុំខ្លាំង ព្រោះវាមានឱកាសតិចជាងក្នុងការធ្វើឱ្យជាតិស្ករក្នុងឈាមកើនឡើងយ៉ាងឆាប់រហ័ស បើប្រៀបធៀបនឹងចេកទុំខ្លាំង។

 

លោកបាននិយាយថា នៅពេលញ៉ាំជាមួយស៊ុតស្ងោរ និងកាហ្វេខ្មៅ អាហារនេះផ្តល់ប្រូតេអ៊ីន និងអាចជួយគាំទ្រសុខភាពប្រព័ន្ធរំលាយអាហារ និងថ្លើម។ លោក Chien បានលើកយកករណីអ្នកជំងឺស្ត្រីម្នាក់ដែលស្រកទម្ងន់បាន ៥ គីឡូក្រាម បន្ទាប់ពីអនុវត្តវិធីសាស្ត្ររបបអាហារនេះ។

 

លោកក៏បានបន្ថែមថា ការផឹកទឹកមុនពេលទទួលទានអាហារ ក៏អាចជួយដល់ការសម្រកទម្ងន់ផងដែរ។ វិធីដែលលោកណែនាំ គឺផឹកទឹកស្អាតប្រហែល ៥០០ មីលីលីត្រ ៣០ នាទីមុនពេលញ៉ាំអាហារ។

 

ការផឹកទឹកអាចជួយបង្កើនអារម្មណ៍ឆ្អែត ដែលអាចធ្វើឱ្យមនុស្សទទួលទានអាហារតិចជាងមុនក្នុងមួយពេល។ លោក Chien បាននិយាយថា ការសិក្សាមួយចំនួនបានរកឃើញថា មនុស្សដែលអនុវត្តវិធីនេះ អាចស្រកទម្ងន់ជាមធ្យមប្រហែល ២ គីឡូក្រាមក្នុងរយៈពេល ៣ ខែ។

 

លោកបានបញ្ជាក់ថា ប្រសិនបើរួមបញ្ចូលជាមួយរបបអាហារដែលមានតុល្យភាព ទម្លាប់ដ៏សាមញ្ញនេះអាចជាវិធីដែលចំណាយតិច និងងាយស្រួល ដើម្បីជួយគ្រប់គ្រងទម្ងន់ និងថែរក្សាសុខភាពថ្លើម៕