ខេត្តកំពង់ស្ពឺ៖ ទីតាំងប្រមូលទុកឈើអារចំនួន ២ កន្លែង ត្រូវបានកម្លាំងមន្ត្រីឧទ្យានុរក្សប្រទះឃើញ ក្នុងអំឡុង ពេលចុះល្បាតចាប់ពីថ្ងៃទី២០ ដល់ថ្ងៃទី២១ ខែតុលា ឆ្នាំ២០២៦ នៅចំណុចខ្នងភ្នំអាកោន ស្ថិតក្នុងភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។ ឈើអារដែលប្រទះឃើញទាំងនោះជាប្រភេទឈើគគីរ មានចំនួនសរុប ១៤៤ សន្លឹក។ នេះបើតាមការបញ្ជាក់របស់មន្ទីរបរិស្ថានខេត្តកំពង់ស្ពឺ។
យោងតាមព័ត៌មានពីមន្ទីរបរិស្ថានខេត្តកំពង់ស្ពឺ ទីតាំងស្តុកឈើទាំងពីរនោះមានចម្ងាយប្រមាណ ១៥០ ម៉ែត្រពីគ្នា ដោយមានឈើអារប្រភេទគគីរនៅតាមទីតាំងនីមួយៗដូចខាងក្រោម៖
– ទីតាំងទី១៖ ស្ថិតនៅត្រង់និយាមកា (410653- 1321340) មានឈើអារប្រភេទគគីរ ចំនួន ១០១ សន្លឹក ដែលមានមុខកាត់ ០,០៥ម៉ែត្រ × ០,១៥ម៉ែត្រ × ៧ម៉ែត្រ។
– ទីតាំងទី២៖ ស្ថិតនៅត្រង់និយាមកា (410803-1321178) មានឈើអារប្រភេទគគីរ ចំនួន ៤៣ សន្លឹក ដែលមានមុខកាត់ ០,០៥ម៉ែត្រ × ០,១៥ម៉ែត្រ × ៨ម៉ែត្រ។
ការប្រទះឃើញទីតាំងស្តុកឈើទាំងពីរនេះ បានធ្វើឡើងក្នុងអំឡុងពេលមន្ត្រីឧទ្យានុរក្សចុះល្បាតនៅតំបន់ខ្នងភ្នំអាកោន ក្នុងគោលដៅត្រួតពិនិត្យ និងការពារធនធានធម្មជាតិ។
យ៉ាងណាមិញ ព័ត៌មានដែលបានផ្តល់មិនទាន់បញ្ជាក់អំពីម្ចាស់ឈើ ប្រភពដើមនៃឈើ ឬវិធានការបន្តរបស់សមត្ថកិច្ចចំពោះឈើអារទាំងនោះនៅឡើយទេ៕
ដោយ៖ សុរិយា
