ខេត្តព្រះសីហនុ៖ នៅវេលាម៉ោង៦ល្ងាចថ្ងៃទី៣១ ខែតុលា ឆ្នាំ២០១៦ កម្លាំងជំនាញការិយាល័យកណ្តាលនគរបាលព្រហ្មទណ្ឌ បានសហការជាមួយកម្លាំងអធិការនគរបាលក្រុងព្រះសីហនុ ធ្វើការស្រាវជ្រាវយ៉ាងយកចិត្តទុកដាក់ ជាលទ្ធផលធ្វើការឃាត់ខ្លួនជនសង្ស័យ៤នាក់ ពាក់ព័ន្ធករណីលួចម៉ូតូ កាលពីថ្ងៃទី១៩ ខែតុលា ឆ្នាំ២០១៦ នៅភូមិ៣ សង្កាត់លេខ៣ ក្រុងព្រះសីហនុ ។

សមត្ថកិច្ចប្រាប់ឲ្យដឹងថា ជនសង្ស័យមានទី១.ឈ្មោះស្វាយ ធូ ភេទប្រុស អាយុ២២ឆ្នាំ ស្នាក់នៅអគារបុគ្គលិកកាំសាប (សមគំនិតទទួលផល) ទី២.ឈ្មោះសៀង សៀន ភេទប្រុស អាយុ២១ឆ្នាំ ស្នាក់នៅផ្ទះជួលមុខផ្ទះសំណាក់ម៉ារីណា ភូមិ៣ សង្កាត់៣ ក្រុងព្រះសីហនុ (សមគំនិតទទួលផល) ទី៣.ឈ្មោះម៉េង យានិកា ភេទប្រុស អាយុ៣៥ឆ្នាំ ស្នាក់នៅក្រុម២៥ ភូមិ៣ សង្កាត់៣ ក្រុងព្រះសីហនុ (ទទួលផល) អ្នកទទួលបញ្ចាំ និងទី៤.ឈ្មោះជុំ ដានី ភេទប្រុស អាយុ២០ឆ្នាំ មានទីលំនៅភូមិ៣ សង្កាត់៣ ក្រុងព្រះសីហនុ(សមគំនិតទទួលផល)។

សមត្ថកិច្ចបន្តថា ជនសង្ស័យ (ជាចារី) ឈ្មោះភា បានរត់គេចខ្លួនសមត្ថកិច្ចកំពុងតាមចាប់។

បើតាមប្រភពពីជនរងគ្រោះឈ្មោះ យ៉ែម សុផាន់ណា ភេទប្រុស អាយុ២២ឆ្នាំ ធ្វើការនៅសណ្ឋាគារលើភ្នំ ស្នាក់នៅផ្ទះជួលក្រុម៨ ភូមិ២ សង្កាត់៤ ខេត្តព្រះសីហនុ បាននិយាយថា ខ្លួនបាត់ម៉ូតូពីក្នុងផ្ទះកាលពីថ្ងៃទី១៩ ខែតុលា ឆ្នាំ២០១៦ ។

ក្រោយធ្វើការឃាត់ខ្លួនជនសង្ស័យខាងលើ សមត្ថកិច្ចរឹបអូសបានម៉ូតូ១គ្រឿងម៉ាកហុងដាឌ្រីម សេ១១០ ពណ៌ខ្មៅ គ្មានស្លាកលេខ។

បច្ចុប្បន្នជនសង្ស័យនិងវត្ថុតាងកម្លាំងជំនាញកំពុងបន្តនីតិវិធីបញ្ជូនទៅតុលាការ៕

ដោយ៖ ឆ្លាម សមុទ្រ