ភ្នំពេញ៖ ក្រុមកម្មករសំណង់ពី២ក្រុមបានផឹកស៊ីនៅក្បែរគ្នាហើយឌឺដងដាក់គ្នាក៏ផ្ទុះហិង្សាដេញវាយកាប់ចាក់បង្កឲ្យយុវជនម្នាក់ស្លាប់និងជាច្រើនអ្នកទៀតរងរបួស កាលពីវេលាម៉ោង១០និង៣០នាទីយប់ថ្ងៃទី១៨ ខែធ្នូ ឆ្នាំ២០១៦ នៅចំណុចគល់ស្ពានភ្លោះចេញពីកោះពេជ្យ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យុវជនដែលបានគេកាប់ស្លាប់ឈ្មោះ គង់ ឡែន ភេទប្រុស អាយុ១៦ឆ្នាំ មុខរបរជាកម្មករសំណង មានស្រុកកំណើតនៅខេត្តកំពង់ស្ពឺ ភ្លាមនោះៗជនរងគ្រោះបានបញ្ជូនទៅមន្ទីរពេទ្យកាល់ម៉ែតតែជនរងគ្រោះបានដាច់ខ្យល់ស្លាប់បាត់ទៅហើយ។ ចំណែកកម្មករសំណងជាច្រើននាក់រងរបួសធ្ងន់បញ្ជូនទៅមន្ទីរពេទ្យរុស្ស៊ីកំពុងសម្រាកព្យាបាល ។

បើតាមសាក្សីពីកម្មករសំណងម្នាក់បានប្រាប់ឲ្យដឹងថា រឿងហេតុខាងលើនេះចេញមកពីខាងក្រុមរបស់ខ្លួនបានយកស្បែកជើងកដេញគុបកណ្ដុរហើយក៏បានផ្ទុះហិង្សាបង្កឲ្យដេញកាប់ចាក់គ្នាតែម្តង។

ក្រោយពេលកើតហេតុជនសង្ស័យជាច្រើននាក់ត្រូវបានសមត្ថកិច្ចបញ្ជូនទៅអធិការដ្នាននគរបាលខណ្ឌចំកាមនដើម្បីស្រាវជ្រាវនិងចាត់វិធានការទៅតាមផ្លូវច្បាប់៕

ដោយ៖ ស រស្មី