ភ្នំពេញ៖ យុវជនម្នាក់ត្រូវបានក្រុមជនសង្ស័យមួយក្រុមមានគ្នា៣នាក់ធ្វើសកម្មភាពវាយប្លន់យកម៉ូតូនិចមួយគ្រឿងទៅបាត់ខណៈដែលជនរងគ្រោះឈប់បត់ជើងតូច កាលពីវេលាម៉ោង១០និង២០នាទីយប់ថ្ងៃទី១៩ ខែធ្នូ ឆ្នាំ២០១៦ នៅចំណុចផ្លូវលូទឹកស្អុយខាងក្រោយវត្តទួលសង្កែ ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

ជនរងគ្រោះមានឈ្មោះ សំ សំណាង ភេទប្រុស អាយុ២១ឆ្នាំ ធ្វើការនៅឃ្លាំងស្តុកមាន់នៅជិតផ្សារទួលសង្កែ និងមានស្រុកកំណើតនៅ ភូមិរំចេក៤ ឃុំរតនះ ស្រុកបាត់ដំបង ខេត្តបាត់ដំបង ។

បើតាមសម្ដីជនរងគ្រោះបានរៀបរាប់ឲ្យដឹងថា នៅមុនពេលកើតហេតុរូបគេកំពុងតែនៅក្នុងកម្មវិធីបង្កក់កូនរបស់បងប្អូនដែលនៅជិតកន្លែងកើតហេតុ ហើយបងស្រីរបស់ខ្លួនបានប្រើឲ្យរូបគេទៅមើលឃ្លាំងព្រោះខ្លាចមានចោរគាស់សោចូលយកអីវ៉ាន់ដោយយកម៉ូតូម៉ាកនិច ពណ៌សពាក់ស្លាកលេខភ្នំពេញភ្នំពេញ1CS-3621 ដែលជាម៉ូតូរបស់ក្មួយបង្កើត។ ប្រភពបានបន្តថាក្រោយពីមកពីឃ្លាំងវិញពេលជិះជិតដល់កន្លែងកម្មវិធីរូបគេបានឈប់ម៉ូតូបត់ជើងតូចដោយមិនបានដកសោម៉ូតូនោះទេ ពេលដែលកំពុងតែបត់ជើងតូចមិនទាន់រួចផងស្រាប់តែមានជនសង្ស័យមួយក្រុមមានគ្នា៣នាក់បានដើរមកវាយរូបគេហើយយកម៉ូតូជិះគេចខ្លួនបាត់។

ក្រោយពេលកើតហេតុជនរងគ្រោះបានរាយការណ៍ប្រាប់សមត្ថកិច្ចឲ្យចុះមកកន្លែងកើតហេតុនិងនាំជនរងគ្រោះទៅដាក់ពាក្យបណ្ដឹងនៅប៉ុស្ដិ៍រដ្ឋបាលនគរបាលទួលសង្កែដើម្បីកំណត់មុខសញ្ញា៕

ដោយ៖ ព្រែកជ័យ