ភ្នំពេញ៖ មនុស្សប្រុសស្រី៣នាក់ត្រូវកម្លាំងសមត្ថកិច្ចនគរបាលខណ្ឌសែនសុខធ្វើការឃាត់ខ្លួនខណៈចុះឆែកឆេរផ្ទះជួលមួយកន្លែងនៅម្តុំមុខមន្ទីរពេទ្យព្រះកុសុមះ(អតីតពេទ្យលោកសង្ឃ)តាមចម្លើយសារភាពរបស់ជនសង្ស័យដែលជាអ្នកទិញ។
ករណីចុះឆែកឆេនេះធ្វើឡើងកាលពីវេលាម៉ោង១និង៣០នាទីរសៀលថ្ងៃទី២៦ ខែធ្នូ ឆ្នាំ២០១៦ នៅចំណុចផ្ទះជួល ភូមិត្រំពាំងឈូក សង្កាត់ទឹកថ្លា ខណ្ឌសែនសុខ។
ប្រតិបត្តការនេះដឹកនាំដោយលោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខនិងមន្ត្រីផ្នែកព្រហ្មទណ្ឌច្រើននាក់ផងដែរ។
ជនសង្ស័យទាំង៣នាក់ដែលឃាត់ខ្លួននោះទី១មានឈ្មោះ ផាន់ សុខវិន ភេទប្រុស អាយុ២០ឆ្នាំ មុខរបរនិងស្នាក់នៅមិនពិតប្រាកដ(ជាអ្នកទិញយកទៅប្រើប្រាស់) ទី២ឈ្មោះ ពៅ សំណាង ភេទស្រី អាយុ៦៧ឆ្នាំ (ជាអ្នកលក់) ស្នាក់នៅផ្ទះជួលកើតហេតុ និងទី៣ឈ្មោះ ងួន ស្រីណេ ភេទស្រី អាយុ១៨ឆ្នាំ មុខរបរជាអ្នករត់តុនៅក្នុងហាង ស្នាក់នៅជាមួយយាយផ្ទះជួលខាងលើ។
ប្រភពពីលោក វរសេនីយ៍ឯក ម៉ក់ ហុង អធិការនគរបាលខណ្ឌបានឲ្យដឹងថា មុននិងឃាត់ខ្លួនស្រ្តីទាំង២នាក់ខាងលើនេះគឺកាលពីយប់មិញវេលាម៉ោង២២និង០០នាទីកម្លាំងរបស់លោកបានឃាត់ខ្លួនជនសង្ស័យម្នាក់ឈ្មោះ ផាន់ សុខវិន ភេទប្រុស អាយុ២០ឆ្នាំដែលជននេះបានធ្វើសកម្មភាពលួចសត្វមាន់មួយក្បាលនៅភូមិគោកឃ្លាង សង្កាត់ភ្នំពេញថ្មី។ ក្រោយមកខាងជំនាញផ្នែកព្រហ្មទណ្ឌបានធ្វើការសាកសួរទើបជននោះឆ្លើយប្រាប់ថា ខ្លួនលួចសត្វមាន់នេះព្រោះគ្មានលុយទិញថ្នាំញៀនជក់ពេលនោះសមត្ថកិច្ចសួរថា ឯងទិញថ្នាំញៀននោះពីកន្លែងណា? ជនសង្ស័យបានឆ្លើយប្រាប់ថា ខ្លួនបានទិញថ្នាំញៀននោះពីផ្ទះស្រ្តីខាងលើ៣ដងមកហើយ ទើបលោកអធិការបានដឹកនាំកម្លាំងនិងនាំជនសង្ស័យទៅឆែកឆេរផ្ទះជួលនោះក៏រកឃើសម្ភារសម្រាប់វេចខ្ជប់គ្រឿងញៀនមួយចំនួនធំទើបឈានដល់ការឃាត់ស្រ្តី២នាក់បន្ថែមទៀតតែម្តង។
ក្នុងការចុះឆែកឆេនោះសមត្ថកិច្ចបានចាប់យកសម្ភារសម្រាប់វេចខ្ជប់គ្រឿងញៀនមួយចំនួនធំប្រាក់រៀល១លាន៥០មុឺនរៀល ប្រាក់ដុល្លារ១២០(មួយរយម្ភៃដុល្លា)។
នៅចំពោះមុខសមត្ថកិច្ចស្ត្រីឈ្មោះ ពៅ សំណាង អាយុ៦៧ឆ្នាំ បានឆ្លើយសារភាពថា គាត់ពិតជាបានលក់ថ្នាំញៀនឲ្យទៅជនសង្ស័យនោះពិតប្រាកដមែន។ ប៉ុន្តែនៅពេលដែលសមត្ថកិច្ចចុះឆែកឆេរនោះគឺគាត់លក់ថ្នាំនេះអស់ហើយនៅសល់តែសម្ភារ។
បច្ចុប្បន្នជនសង្ស័យទាំង៣នាក់កំពុងឃាត់ខ្លួននៅអធិការនគរបាលខណ្ឌសែនសុខនិងកសាងសំណុំរឿងបញ្ជួនទៅតុលាកាចាត់ការបន្ត៕
ដោយ៖ តុង សីហា
