ខេត្តកណ្តាល ៖ មានសេចក្តីរាយការណ៍ឲ្យដឹងថា រថយន្តម៉ាកHYUNDAIបាន បើកកៀរម៉ូតូមួយគ្រឿងរួចខ្ទាតមនុស្សចូលកង់រថយន្តកិនស្លាប់នៅនឹងកន្លែងកើតហេតុ កាលពីវេលាម៉ោង៤និង២០នាទី ថ្ងៃទី២៨ ខែធ្នូ ឆ្នាំ២០១៦ នៅត្រង់ចំណុចខាងមុខយានដ្ឋានជួសជុលរថយន្ត យីហោលីសេងផៃ លើផ្លូវលេខ១១៥ ឋិតក្នុងភូមិព្រែករាំងសង្កាត់កំពង់សំណាញ់ ក្រុងតាខ្មៅ ខេត្ត កណ្តាល ។

សមត្ថកិច្ចនគរបាលក្រុងតាខ្មៅបានឲ្យដឹងថា រថយន្តបង្កហេតុម៉ាកHYUNDAI ពណ៌ក្រហម ពាក់ផ្លាកលេខភ្នំពេញ3C.0728 អ្នកបើកបរមិនស្គាល់អត្តសញ្ញាណ  (រត់គេចខ្លួនបាត់) បើកបរក្នុងទិសដៅពីលិចមកកើត ។ លុះមកដល់ចំណុចកើតហេតុក៏បានកៀរ និងកិនម៉ូតូមួយ គ្រឿងម៉ាក HONDA DREAM125 ពណ៌ខ្មៅ ពាក់ផ្លាកលេខកណ្តាល1I-4972 បើកបរក្នុងទិស ដៅពីលិចមកកើត ស្របទិសគ្នា បើកបរដោយបុរសឈ្មោះ ថន ថុន ភេទប្រុសអាយុ២៤ឆ្នាំ នៅភូមិព្រែកហូរកើត១ សង្កាត់ព្រែកហូរ ក្រុងតាខ្មៅ បណ្តាលឲ្យអ្នកបើកបរម៉ូតូខ្ទាតចូលកង់រថយន្តកិនស្លាប់នៅនឹងកើតហេតុ ។

ក្រោយកើតហេតុសមត្ថកិច្ចបានចុះមកធ្វើកំណត់ហេតុវាស់វែងតាមជំនាញ ។ សពត្រូវបានប្រគល់អោយទៅក្រុមគ្រួសារយកទៅធ្វើបុណ្យតាមប្រពៃណី ។ ចំណែកមធ្យោបាយពាក់ ព័ន្ធត្រូវបានយកមករក្សាទុកនៅអធិការដ្ឋានបណ្តោះអាសន្នដើម្បីចាត់ការតាមនិតិវិធី៕ ស្អាងជ័យ