ភ្នំពេញ៖ ក្រុមអាណាចក្របៃតងនិង ក្រុមសហភាពសហព័ន្ធយុវជនកម្ពុជាស្រុកកំចាយមារបានឆ្លងផុតវគ្គជម្រុះក្នុងពូលA និងពូលBឡើងទៅរងចាំនៅជុំទី២វគ្គ១៦ក្រុមបន្តក្រោយពីក្រុមអាណាចក្របៃតងឈ្នះក្រុមយុវជន “ក” ១២ក្នុងលទ្ធផល២ទល់១នៅទីលានពហុកីឡដ្ឋានជាតិ ខណៈ ដែលក្រុមយុវជនកម្ពុជា ស្រុកកំចាយមារឈ្នះក្រុមបាសាក់ក្នុងលទ្ធផល៣ទល់២នៅទីលានបាល់ទាត់វើសស្ទើនកាលពី រសៀលថ្ងៃទី៤ ខែមករា ឆ្នាំ២០១៧។ សម្រាប់លទ្ធផលប្រកួតដែលនាំឲ្យក្រុម អាណាចក្របៃតងរកបាន២គ្រាប់នោះ គឺកីឡាករពេជ្រ ស៊ីណា ធ្វើបានសម្រេច នៅក្នុងនាទី៤៩ និងកីឡាករ លីម ចាន់ លាភ នៅនាទី៦៦។ ចំណែកឯ១គ្រប់របស់ ក្រុមយុវជនក១២រកបានដោយកីឡាករ គាត លីមទី នៅនាទី១៥ ។

លោក ភា សុភត្រ្តា គ្រូបង្វឹកក្រុមបាល់ទាត់អាណាចក្របៃតងបានប្រាប់ឲ្យដឹងថា ជ័យជម្នះប្រកួតចុងក្រោយវគ្គជម្រុះក្នុង ពូលAនេះ ក្រុមអាណាចក្របៃតងរបស់លោកមិនមែនប្រកួតឈ្នះយុវជនក១២ដែលជាក្រុមខ្លាំងដោយចៃដន្យនោះទេ អ្វីទាំងនេះបានមកពីការខិតខំរួមគ្នា និងមានការ រៀបគម្រោងទុកមុនដើម្បីតម្រូវទៅនឹង កម្លាំងរបស់កីឡាករទើបទទួលបានលទ្ធ ផលជោគជ័យបែបនេះ។

ដោយឡែកក្រុមសហភាពសហព័ន្ធយុវជនកម្ពុជាស្រុកកំចាយមារពូលB បានប្រកួតឈ្នះក្រុមបាសាក់ក្នុងលទ្ធផល៣ទល់២នៅទីលានបាល់ទាត់វេសស្ទើន។ ចំពោះការប្រកួតបង្គ្រប់កិច្ចនៅក្នុងពូលAវិញ ក្រុមសាធារណការនិងដឹកជញ្ជូនបានប្រកួត ឈ្នះ ក្រុមយុវជន៧មករាក្នុងលទ្ធផល៤ទល់៣ ។ ចំណែកក្រុមយុវជនជ្រោយមេត្រី ពូលBបានប្រកួតយកឈ្នះលើក្រុមឌ្រឹមហោសហ៍ក្នុងលទ្ធផល ២ទល់០ ៕

ដោយ៖ សារីម