ភ្នំពេញ៖ ក្រុមក្មេងប្រុសស្រី១០នាក់រួមនិងម្សៅក្រាមសថ្លា១កញ្ចប់ត្រូវបានសមត្ថកិច្ចនគរបាលខណ្ឌសហការជាមួយប៉ុស្តិ៍ភ្នំពេញថ្មីធ្វើការឃាត់ខ្លួន ខណៈពួកគេបាននាំគ្នាទៅជួលបន្ទប់ផ្ទះសំណាក់ភូមិគ្រិះប៊្លូហូមដើម្បីសម្ងំប្រើប្រាស់គ្រឿងញៀន។

ការឃាត់ខ្លួននេះបានធ្វើឡើងនៅវេលាម៉ោង១០និង៣០នាទីព្រឹកថ្ងៃទី១៧ ខែមករា ឆ្នាំ២០១៧ ស្ថិតនៅក្នុងបន្ទប់ផ្ទះសំណាក់ភូមិគ្រិះប៊្លូហូមតាមបណ្តោយផ្លូវ១៩៨២ ក្រុម៩ ភូមិភ្នំពេញ សង្កាត់ភ្នំពេញថ្មី ខណ្ឌសែនសុខ។

សមត្ថកិច្ចបានឲ្យដឹងថា ដោយមានបទបញ្ជាផ្ទាល់ពីលោកវរសេនីយ៍ឯក ម៉ក់ ហុង អធិការនគរបាលខណ្ឌបានឲ្យកម្លាំងប៉ុស្តិ៍ទាំងបួនក្នុងខណ្ឌឲ្យចុះត្រួតពិនិត្យតាមផ្ទះសំណាក់ទាំងអស់ ដើម្បីទប់ស្កាត់នៅបទល្មើសគ្រឿងញៀនដែលជាយុទ្ធនាការលប់បំបាត់គ្រឿងញៀន។

ជាក់ស្តែងសមត្ថកិច្ចបានចុះមកដល់ផ្ទះសំណាក់ខាងលើហើយសុំគោលការពីលោកព្រះរាជអាជ្ញាដើម្បីធ្វើការឆែកឆេរនិងត្រួតពិនិត្យចំនួន៣បន្ទប់ហើយរកឃើញក្រុមក្មេងស្ទាវប្រុសស្រី១០នាក់ ក្នុងស្រីម្នាក់ និងម្សៅក្រាមសថ្លា១កញ្ចប់ សម្ភារសម្រាប់ប្រើប្រាស់មួយចំនួនទៀត និងម៉ូតូ២គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅ គ្មានស្លាកលេខ និងម៉ាកZOOMER-X ពណ៌សលាយខ្មៅ ពាក់ស្លាកលេខភ្នំពេញ1FM-6058។

ក្រោយមកសមត្ថកិច្ចបានបញ្ជូនជនសង្ស័យទៅអធិការដ្ឋាននគរបាលខណ្ឌសែនសុខដើម្បីធ្វើតេស្តរកសារធាតុញៀនដោយក្នុងចំណោម១០នាក់អ្នកមានសារធាតុញៀនចំនួន៩នាក់ ចំណែកម្នាក់ដែលគ្មានសារធាតុញៀនអនុញ្ញាតឲ្យត្រឡប់ទៅផ្ទះវិញ។ បច្ចុប្បន្នជនសង្ស័យទាំង៩នាក់ដែលមានសារធាតុញៀននោះសមត្ថកិច្ចកំពុងសាកសួរបន្ត៕ តុង សីហា