ភ្នំពេញ៖ ជនសង្ស័យ៤នាក់ត្រូវបានកម្លាំងនគរបាលល្បាតខណ្ឌពោធិ៍សែនជ័យឃាត់ខ្លួន កាលពីវេលាម៉ោង១០យប់ថ្ងៃទី២០ ខែមករា ឆ្នាំ២០១៧ នៅចំណុចមុខមីតណាយក្លឹប តាមបណ្តោយផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ដកហូតថ្នាំញៀន១៤កញ្ចប់តូច។

ជនសង្ស័យទី១ឈ្មោះ អាខ្មៅ ភេទប្រុស អាយុ១៥ឆ្នាំ ទីលំនៅមិនពិតប្រកដ។ ទី២ឈ្មោះ ថុល ទី ភេទប្រុស អាយុ១៨ឆ្នាំ ស្នាក់នៅជិតផ្សារត្រពាំងថ្លឹង សង្កាត់ចោមចៅ  ទី៣ឈ្មោះ ឈាន ភារះ ភេទប្រុស អាយុ៣៥ឆ្នាំ មុខរបរ ជាងពិតាន ស្នាក់នៅជិតសាលាគោកញ្ជាន់ សង្កាត់ចោមចៅ និងទី៤ឈ្មោះ ឈាន ផាន់ណា ភេទប្រុស ១៧ ឆ្នាំ មុខរបមិនពិតប្រកដ ។

ប្រភព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ កម្លាំងល្បាតខណ្ឌបានចុះល្បាតក្នុងមូលដ្ឋានដើម្បីការពារសុវត្ថិភាពជូនប្រជាពលរដ្ឋ ខណៈល្បាតមកដល់ចំណុចមុខក្លឹប មីតណាយ ក៏ប្រទះឃើញជនសង្ស័យម្នាក់ឈរស្ពាយកាបូបមួយ ដោយមានការសង្ស័យទើបចុះឆែកឆេររកឃើញថ្នាំញៀន១២កញ្ចប់តូច ។ ក្រោយមក ទើបជនសង្ស័យរួបនោះបានឆ្លើយសារភាពថា រួបគេបានយកថ្នាំពីជនសង្ស័យម្នាក់ទៀត ដែលឈរឆ្ងាយពីគ្នាប្រហែល៥០ម៉ែត្រ ទើបកម្លាំងចុះទៅឃាត់មនុស្ស៣នាក់ទៀត និងរកឃើញថ្នាំញៀនចំនួន២កញ្ចប់តូចទៀត សរុប១៤កញ្ចប់តូច ។

ក្រោយពេលឃាត់ខ្លួន កម្លាំងនគរបាលបានយកជសង្ស័យទាំង៤នាក់យកទៅអធិការដ្ឋាននគរបាលខណ្ឌពោធិ៍សែនជ័យរង់ចាំកសាងសំណុំរឿងបញ្ជូនទៅតុលាការបន្ត៕ សុខាសែនជ័យ