ភ្នំពេញ៖ លោក ហែម ដារិទ្ធ ប្រធាន ក្លិបបាល់ទាត់ខណ្ឌពោធិ៍សែនជ័យបាន ថ្លែងប្រាប់ក្រុមអ្នកសារព័ត៌មានថា ប្រសិនបើក្រុមខណ្ឌពោធិ៍សែនជ័យអាចលើកពានរង្វាន់ Soccer League2017 សម្រាប់វគ្គផ្តាច់ព្រ័ត្រនោះក្រុមរបស់លោកយកតែពានរង្វាន់ទេ ចំណែកឯថវិកាទាំងប៉ុន្មាននឹងប្រគល់ ជូនមន្ទីរពេទ្យគន្ធបុប្ផាទាំងអស់។ ការថ្លែង បែបនេះរបស់លោក ហែម ដារិទ្ធ ធ្វើឡើង ក្រោយពេលក្រុមរបស់លោកលេងឈ្នះក្រុមជើងឯកឆ្នាំចាស់អាណាចក្របៃតងក្នុង លទ្ធផល២ទល់០នៅវគ្គពាក់កណ្តាលផ្តាច់ព្រ័ត្រកាលពីល្ងាចថ្ងៃទី២២ ខែមករា ឆ្នាំ២០១៧ នៅពហុកីឡដ្ឋានជាតិ ។

លោក ហែម ដារិទ្ធ បានអះអាងថា ក្តីសង្ឃឹមរបស់យើងមានសម្រាប់ការប្រកួត វគ្គផ្តាច់ព្រ័ត្រ ប៉ុន្តែក្រុមខ្លាំងចំនួន២គឺក្រុមយុវជនកំចាយមារនិងក្រុមឆន្ទៈកីឡាសុទ្ធតែជាក្រុមខ្លាំងដែរ ព្រោះក្រុមដែលឡើង ដល់វគ្គពាក់កណ្តាលផ្តាច់ព្រ័ត្រាក្រុមមិន ធម្មតាទេ។ យ៉ាងណាលោកនិងគ្រូបង្វឹកបានគិតគូររួចហើយនូវយុទ្ធវិធីក្នុងការលេងដើម្បីទប់ទល់ជាមួយក្រុមទាំងនោះប្រសិន ក្រុមណាមួយអាចឡើងជួបក្រុមរបស់លោកនៅវគ្គផ្តាច់ព្រ័ត្រនាថ្ងៃទី២៦ ខែមករា ឆ្នាំ ២០១៧ខាងមុខ ។

លោកបានបញ្ជាក់បន្ថែមថា “ប្រសិនបើក្រុមខណ្ឌពោធិ៍សែនជ័យអាចលើក ពាន Soccer League 2017 មែននោះ ក្រុម របស់លោកយកតែពានប៉ុណ្ណោះ រីឯប្រាក់ រង្វាន់ទាំងប៉ុន្មានប្រគល់ជូនមន្ទីរពេទ្យគន្ធបុប្ផាទាំងអស់។ ហេតុដូច្នេះលោកសូម អំពាវនាវដល់បងប្អូនស្នេហាវិស័យកីឡាសូមចូលរួមគាំទ្រនិងលើកទឹកចិត្តសម្រាប់ក្រុមខណ្ឌពោធិ៍សែននៅថ្ងៃប្រកួតផ្តាច់ ព្រ័ត្រផង” ។

ដោយឡែកលោក ភា សុភ័ត្រ្កា គ្រូបង្វឹក ក្រុមអាណាចក្របៃតងអតីតម្ចាស់ជើងឯកឆ្នាំចាស់បានធ្លាក់មកដណ្តើមពានរង្វាន់លេខ៣នៃការប្រកួតបាល់ទាត់ Soccer League រដូវកាលទី៤ ឆ្នាំ២០១៧បានលើក ឡើងថា ការប្រកួតនៅវគ្គពាក់កណ្តាល ផ្តាច់ព្រ័ត្រនេះ ក្រុមទាំង២សុទ្ធតែលេង បានយ៉ាងល្អ និងស្វិតស្វាញមែនទែន ប៉ុន្តែក្រុមអាណាចក្របៃតងធ្វើមិនជោគជ័យដោយលេងចាញ់ក្រុមខណ្ឌពោធិ៍សែនជ័យក្នុងលទ្ធផល២ទល់០ដោយសារក្រុមរបស់លោកបាត់បង់កីឡាករល្អ៣នាក់មិនបាន មកចូលរួមហ្វឹកហាត់និងប្រកួតនៅក្នុង ជំនួបដ៏សំខាន់នេះ ។

សូមរំលឹកថា ក្រុមខណ្ឌពោធិ៍សែនជ័យនៅក្នុងជំនួបវគ្គពាក់កណ្តាលផ្តាច់ព្រ័ត្រជាមួយក្រុមអាណចក្របៃតងនេះគឺរកបានដោយកីឡាករ ស៊ាំ សារ៉ាន់ និងកីឡាករ នួន ស៊ីថាន នៅវគ្គទី២នៃការប្រកួត ៕ សារីម