ភ្នំពេញ៖ រថយន្តទំនើបម៉ាកឡង់គ្រីស័រមួយគ្រឿង បានបើកបុកពីក្រោយរថយន្តឡិចស៊ីស RX៤៧០ ដែលបើកមកឈប់កាក់ពីមុខ បណ្តាលឲ្យរងការខូចខាតផ្នែកខាងមុខយ៉ាងដំណំ ហើយម្ចាស់រថយន្តទាំង២មិនព្រមដោះស្រាយគ្នាតាមសម្រួលនោះទេ បែរជាបង្កជាជម្លោះឈ្លោះទាស់សម្ដីគ្នាផ្អើលដល់ប្រជាពលរដ្ឋនិងសមត្ថកិច្ចមូលដ្ឋាន។
ហេតុការណ៍នេះកើតឡើងនៅវេលាម៉ោង ៨និង៥៩នាទីយប់ ថ្ងៃទី២៤ ខែមករា ឆ្នាំ២០១៧ នៅចំណុចមុខសាលាអន្តរជាតិ ឃិតវ័រ ស្ថិតនៅតាមបណ្តោយផ្លូវលេខ៣១០ ស្ថិតនៅក្នុងសង្កាត់ បឹងកេងកង១ ខណ្ឌចំការមន។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តឡង់គ្រីស័រ មួយគ្រឿង ពណ៌ស ពាក់ស្លាកលេខភ្នំពេញ2AH-5857 ជិះដោយប្តីប្រពន្ធ២នាក់ ដែលបើកបរដោយបុរសជាប្តី បានធ្វើដំណើរតាមបណ្តោយផ្លូវ៣១០ ក្នុងទិសដៅពីលិចទៅកើត ស្របទិសគ្នាជាមួយរថយន្តឡិចស៊ីស៤៧០ ពណ៌ស្ករ មួយគ្រឿង ពាក់ស្លាកលេខ ភ្នំពេញ2P-4037 ជិះដោយប្តីប្រពន្ធ២នាក់ បានបើកបរឆ្លងស្តុប ដោយរថយន្តឡង់គ្រីស័រទំនើបបានបើកបរនៅខាងមុខ រថយន្តឡិចស៊ីសRX៤៧០ ខណៈមកដល់ចំណុចកើតហេតុ រថយន្តឡិចស៊ីស៤៧០ព្យាយាមបើកជែងរថយន្តឡង់គ្រីស័រ ដោយរថយន្តឡិចស៊ីស៤៧០ បានបើកមកកាក់ឈប់ពីមុខភ្លាមៗ ធ្វើឲ្យរថយន្តឡង់គ្រីស័របុកគូទពីក្រោយពេញទំហឹង រងការខូចខាតផ្នែកខាងមុខ បន្ទាប់មកម្ចាស់រថយន្តទាំងសងខាងបានប្រកែកគ្នារកខុសរកត្រូវរៀងៗខ្លួន ធ្វើឲ្យមានការភ្ញាក់ផ្អើលដល់សមត្ថកិច្ចចុះមកអន្តរាគមន៍សម្របសម្រួលដោយខាងរថយន្តឡិចស៊ីស៤៧០ព្រមសងថ្លៃខូចខាតទៅម្ចាស់រថយន្តឡង់គ្រីស័រចំនួន៥០០ដុល្លារ។
ក្រោយកើតហេតុ តែដោយសារភាគីខាងម្ចាស់រថយន្តឡង់គ្រីស័រមិនព្រមទទួលសំណង ក៏អោយម្ចាស់រថយន្តឡិចស៊ីសLX៤៧០ យករថយន្តរបស់ខ្លួនទៅជួសជុលឲ្យដូចដើម៕ ភារ៉ា ដង្កោ
