ខេត្តរតនគិរី៖ រថយន្តដឹកគ្រឿងសំណង់ ១គ្រឿងរបស់ដេប៉ូលក់គ្រឿងសំណង់បឹងកំសាន្តបានបុករថយន្តនីហ្សាន់ពីក្រោយ បណ្តាលឲ្យក្រឡាប់ស្លាប់ព្រូម្នាក់ រួចអ្នកបើកបរបង្កបានរត់គេចខ្លួន។ ករណីនេះបានកើតឡើងនៅវេលាម៉ោង៤ និង៤៧នាទីរសៀលថ្ងៃទី២៥ ខែមករា ឆ្នាំ២០១៧ នៅចំណុចផ្លូវកោងមុខសាលាសន្សំកុសល តាមបណ្តោយផ្លូវជាតិលេខ៧៨A ស្ថិតក្នុង ថារ៉ងជង ឃុំ-ស្រុកអូរជុំ ខេត្តរតនគិរី។

តាមប្រភពពីមន្រ្តីនគរបាលស្រុកអូរជុំឲ្យដឹងថា រថយន្តដឹកគ្រឿងសំណង់ដែល បុករថយន្តគេពីក្រោយរួចក្រឡាប់ស្លាប់ព្រូ ម៉ាកហុីយ៉ាន់ដាយ ពណ៌ខៀវលាយត្រួយ ចេក គ្មានស្លាកលេខ ដែលគេដឹងថា ជា រថយន្តរបស់ដេប៉ូលក់គ្រឿងសំណង់បឹង កំសាន្តដែលមានទីតាំងនៅភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី ហើយក្រោយពេលកើតហេតុ អ្នកបើកបររថយន្តដែលគេដឹងថាគ្មានប័ណ្ណបើកបរបានរត់គេចខ្លួន តែយ៉ាងណាគេស្គាល់ឈ្មោះ ឡាំ ប៉ាវ ភេទប្រុស អាយុ២៥ ឆ្នាំ ហើយសមត្ថកិច្ចបាននឹងកំពុងតាមចាប់ខ្លួនយកមកផ្តន្ទាទោសតាមច្បាប់។ ចំណែក ព្រូរថយន្តដែលស្លាប់នៅកន្លែងកើតហេតុឈ្មោះ ប៉ម ពៅ ភេទប្រុស អាយុ២១ឆ្នាំ មានទីលំនៅក្នុងសង្កាត់កាចាញ ក្រុងបាលុង ខេត្តរតនគិរី។

តាមសាក្សីឲ្យដឹងថា នៅមុនពេលកើតហេតុគេបានឃើញរថយន្តដឹកគ្រឿង សំណង់ខាងលើនេះបើកបរក្នុងល្បឿនលឿននៅចំណុងផ្លូវកោងទៅបុករថយន្ត ម៉ាកនីហ្សាន់ ពណ៌ទឹកប្រាក់ ពាក់ស្លាកលេខ ភ្នំពេញ 2Y-0625 ពីក្រោយក្នុងទិសដៅពី ត្បូងទៅជើង។ ពេលនោះបណ្តាលឲ្យព្រូរថយន្តដឹកគ្រឿងសំណង់ស្លាប់មួយរំពេច គ្រាដែលរថយន្តដឹកគ្រឿងសំណង់នេះ ក្រឡាប់។ ចំណែកអ្នកបើករថយន្តនីហ្សាន់ ឈ្មោះ ប៊ុន ណេង ភេទប្រុស អាយុ៤២ឆ្នាំ មានទីលំនៅភូមិថារ៉ងស្វាយ ឃុំ-ស្រុកអូរជុំ មិនរងរបួសនោះទេ តែរថយន្តរបស់គាត់បានរងការខូចយ៉ាងដំណំផ្នែកខាងក្រោយ។

ករណីនេះ ក្រោយពីកើតហេតុសមត្ថ កិច្ចបានចុះទៅវាស់វែង រួចយករថយន្ត ទាំង២គ្រឿងមកកាន់ការិយាល័យនគរបាលចរាចរផ្លូវគោកនៃស្នងការខេត្តរងចាំការដោះស្រាយតាមផ្លូវច្បាប់ ខណៈដែលសាកសពព្រូរថយន្តត្រូវបានសាច់ញាតិដឹកបញ្ជូនទៅលំឋានដើម្បីធ្វើបុណ្យ។

តាមប្រភពពីប្រជាពលរដ្ឋបានឲ្យដឹងថា រថយន្តដឹកគ្រឿងសំណង់ខាងលើនេះ ជាកម្មសិទ្ធិរបស់ឈ្មោះ ថន ជាម្ចាស់ដេ ប៉ូលក់គ្រឿងសំណង់យ៉ីហោបឹងកំសាន្ត។ ប្រភពបានបន្តថា ដេប៉ូលក់គ្រឿងសំណង់នេះមានរថយន្តច្រើនគ្រឿង តែរថយន្ត របស់គេមិនមានលគ្ខណៈបច្ចេកទេសគ្រប់គ្រាន់នោះទេ។ មានន័យថា រថយន្តភាគ ច្រើនបានកែច្នៃ និងដឹកលើសការកំណត់ ម៉្យាងវិញទៀតអ្នកបើកបរភាគច្រើនជា ក្មេងមិនទាន់គ្រប់អាយុ និងគ្មានប័ណ្ណ បើកបរឆ្លងកាត់សាលាថែមទៀត។

ជុំវិញព័ត៌មាននេះ អ្នកយកព័ត៌មាននគរដ្រេហ្គន មិនអាចរកការបកស្រាយពីម្ចាស់ដេប៉ូលក់គ្រឿសំណង់បឹកកំសាន្តបានទេនៅព្រឹកថ្ងៃទី២៦ ខែមករា ឆ្នាំ២០១៧ ដោយសារពុំ មានលេខទូរស័ព្ទ៕ វុទ្ធ ឦសាន