ភ្នំពេញ៖ មុខសញ្ញាជនប្រើប្រាស់គ្រឿងញៀន៣នាក់ ត្រូវបានកម្លាំងនគរបាលអន្តរាគមន៍ខណ្ឌសហការនិងនគរបាលប៉ុស្ដិ៍ចោមចៅ ធ្វើការចាប់ខ្លួនបានខណៈដែលជនទាំងនោះ កំពុងសម្ងំសេពគ្រឿងញៀនជុំគ្នា នៅក្នុងផ្ទះល្វេងដែលសាងសង់ទុកចោលក្នុងដីឡូត៍មួយកន្លែង ដកហូតបាន ដំបងដែកបំពង់ទីប៣ដើម ដាវ១ដើម កាំបិត១ ព្រមទាំងឧបករណ៍សម្រាប់ប្រើប្រាស់គ្រឿងញៀនមួយចំនួនទៀតផងដែរ។

ប្រតិបត្តិការបង្ក្រាបខាងលើនោះបានធ្វើឡើងនៅវេលាម៉ោង១១និង៣០នាទីព្រឹកថ្ងៃទី៩ ខែកុម្ភៈ ឆ្នាំ២០១៧ នៅចំណុចដីឡូត៍មួយកន្លែង ក្នុងផ្ទះល្វេងសាងសង់ទុកចោល ដែលមានទីតាំងស្ថិតនៅខាងក្រោយផ្សារកាណាស៊ីធី ក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

យុវជនទាំង៣នាក់ដែលត្រូវចាប់ខ្លួននោះទី១,ឈ្មោះ កែវ ឡាយ អាយុ១៩ឆ្នាំ ទី២,ឈ្មោះអឿន វ៉ាន់ដារា អាយុ២៤ឆ្នាំ មានស្រុកកំណើតនៅខេត្តពោធិ៍សាត់ និងទី៣,ឈ្មោះឈាន វាសនា អាយុ១៨ឆ្នាំ អ្នកទាំង៣នាក់នោះមានមុខរបរមិនពិតប្រាកដ ស្នាក់នៅកន្លែងកើតហេតុខាងលើ។

តាមប្រភពព័ត៌មានបានឲ្យដឹងថា នៅមុនពេលចាប់ខ្លួនកម្លាំងនគរបាលខាងលើ បានធ្វើការស្រាវជ្រាវ ហើយបានទទួលព័ត៌មានពីប្រជាពលរដ្ឋនៅក្នងមូលដ្ឋានថាបានឃើញជនសង្ស័យទាំង៣នាក់នោះ កំពុងសម្ងំសេពគ្រឿងញៀននៅក្នុងផ្ទះល្វេងខាងលើ។ ក្រោយពីទទួលព័ត៌មានពីប្រជាពលរដ្ឋកម្លាំងក៏បានចុះទៅធ្វើការចាប់ខ្លួនបានទាំងសម្បុកតែម្ដង បន្ទាប់មកជនទាំងនោះរួមទាំងវត្ថុតាង ត្រូវបាននាំទៅកាន់ប៉ុស្ដិ៍ចោមចៅ ដើម្បីសួរនាំនិងកសាងសំណុំរឿងបញ្ជូនទៅសាលាដំបូងចាត់ការតាមច្បាប់៕ សុខាសែនជ័យ