ខេត្តកណ្តាល៖ ជនសង្ស័យជួញដូរថ្នាំ ញៀនម្នាក់ ត្រូវបានសមត្ថកិច្ចនគរបាលស្រុកកណ្តាលស្ទឹងបង្រ្កាបចាប់ខ្លួនបានរួមជាមួយថ្នាំញៀន២កញ្ចប់ធំ-តូច ដើម្បី កសាងសំណុំរឿងចាត់ការតាមច្បាប់។ ប្រតិបត្តិការបង្រ្កាបនេះបានធ្វើឡើងកាលពីវេលាម៉ោង៥ និង៣០នាទីល្ងាច ថ្ងៃទី១៥ ខែកុម្ភៈ ឆ្នាំ២០១៧ ស្ថិតក្នុងភូមិកោះខ្នុរ ឃុំព្រែករកា ស្រុកកណ្តាលស្ទឹង ខេត្ត កណ្តាល។
មន្ត្រីនគរបាលស្រុកកណ្តាលស្ទឹងបានឲ្យដឹងថា ជនសង្ស័យដែលត្រូវបានចាប់ខ្លួននោះឈ្មោះ វ៉ាន់ កុសល់ ភេទប្រុស អាយុ ៣៩ឆ្នាំ មានទីលំនៅភូមិម៉ារៀមទាក ឃុំជីរោទ៍ ស្រុកត្បូងឃ្មុំ ខេត្តត្បូងឃ្មុំ។ ក្នុងប្រតិបត្តិការបង្រ្កាបចាប់ខ្លួនជនសង្ស័យ សមត្ថកិច្ច បានដកហូតថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន២កញ្ចប់ធំ-តូច និង សម្ភារវេចខ្ចប់ថ្នាំញៀនមួយចំនួនផងដែរ។
ប្រភពដដែលបានបន្តថា បន្ទាប់ពីទទួល បានព័ត៌មានពីមហាជនថានៅក្នុងភូមិកោះខ្នុរ ឃុំព្រែករកា ស្រុកកណ្តាលស្ទឹង មាន ជនសង្ស័យធ្វើសកម្មភាពជួញដូរថ្នាំញៀន សមត្ថកិច្ចនគរបាលស្រុកកណ្តាលស្ទឹងបាន សហការជាមួយនគរបាលប៉ុស្តិ៍ចុះឃ្លាំមើលរហូតឈានដល់បង្រ្កាបចាប់ខ្លួនជនសង្ស័យរួមជាមួយវត្ថុតាងជាក់ស្តែង ដើម្បី កសាងសំណុំរឿងចាត់ការតាមច្បាប់៕ ស្អាងជ័យ
