យោងទៅតាមប្រភពព័ត៌មានពីគេហ ទំព័រអង់គ្លេស Dailymail បានឲ្យដឹងថា ខ្សែប្រយុទ្ធ Wayne Rooney ឆ្អែតចិត្តនឹង ក្លិបបិសាចក្រហម Manchester Unitedហើយអាចនឹងផ្លាស់ទៅកាន់ប្រទេសចិនដោយមានក្លិបមួយហ៊ានផ្តល់តម្លៃខ្លួន៣៥លានផោន ។

ខ្សែប្រយុទ្ធវ័យ៣១ឆ្នាំសញ្ជាតិអង់គ្លេស រូបនេះគឺជាម្ចាស់កំណត់ត្រាកីឡាកររកគ្រាប់បាល់បានច្រើនជាងគេបំផុតនៅក្នុងក្លិប បិសាចក្រហមដោយស៊ុតបាល់បាន២៥០គ្រាប់។ បច្ចុប្បន្នRooneyមិនសប្បាយចិត្តឡើយដោយសារតែគ្មានឱកាសលេងបាល់សោះក្នុងក្រុម Man United ដែលកំពុងតែ ដឹកនាំដោយលោក Jose Mourinho។

អ្នកសារព័ត៌មានកាន់តែចង់ដឹងខ្លាំងនៅពេលទីផ្សារដោះដូរកីឡាករនៅចិននឹងបិទនៅខែក្រោយហើយពួកគេបានសួរទៅកាន់លោក Jose Mourinho អំពីអនាគត របស់Wayne Rooney។ អ្នកចាត់ការទូទៅសញ្ជាតិព័រទុយហ្គាល់រូបនេះបានថ្លែងប្រាប់អ្នកសារព័ត៌មានថា “ខ្ញុំមិនអាចធានាពីអនាគត របស់គាត់ថានឹងនៅក្នុងក្លិបនេះនោះទេ។ ទោះបីជាខ្ញុំផ្ទាល់ក៏មិនអាចធានាថាខ្ញុំនឹងនៅទីនេះនៅសប្តាហ៍ក្រោយដែរ។អ្នកគួរតែទៅសួរគាត់ខ្លួនឯងទៅ” ។

គួរបញ្ជាក់ថា Rooneyបានមកហ្វឹកហាត់ជាមួយនឹងក្រុមជម្រើសដំបូងរបស់ខ្លួន ប៉ុន្តែមិនត្រូវបាន ជ្រើសរើសឲ្យចូលរួមក្រុមទាំង២០នាក់ដែលត្រូវលេងជាមួយនឹងក្រុមSaint-Etienneក្នុងកម្មវិធីEuropa League ជើងទី២ឡើយ ៕ ដេវីត