ភ្នំពេញ៖ នារីម្នាក់បានធ្វើសកម្មភាពចែកចាយគ្រឿងញៀននៅប្លុកផ្លូវរថភ្លើងដើម្បីបន្លំរូបភាព ប៉ុន្តែទោះបីជាយ៉ាងណាក៏ដោយ សមត្ថកិច្ចនគរបាលខណ្ឌទួលគោកធ្វើការស្រាវជ្រាវរហូតឈានដល់ការឃាត់ខ្លួនបានជាក់ស្តែង កាលពីវេលាម៉ោង១០និង២០នាទីព្រឹកថ្ងៃទី៦ ខែមីនា ឆ្នាំ២០១៧ ប្រព្រឹត្តនៅចំណុចផ្លូវរថភ្លើង ក្រុមទី១០៩ ភូមិ២៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។

តាមប្រភពព័ត៌មានពីមន្រ្តីនគបាលព្រហ្មទណ្ឌខណ្ឌទួលគោកបានឲ្យដឹងថា នារីសង្ស័យដែលសមត្ថកិច្ចឃាត់ខ្លួននោះឈ្មោះ សុខ យី ភេទស្រី អាយុ១៨ឆ្នាំ ជនជាតិខ្មែរ មុខរបបនិងស្នាក់នៅមិនពិតប្រាកដ។ ចំណែកវត្ថុតាងចាប់យកមាន៖ ក្រាមពណ៌សថ្លាចំនួន២២កញ្ចប់តូច (សង្ស័យជាគ្រឿងញៀន) ។

បច្ចុប្បន្នជនសង្ស័យកំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរនិងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់ ៕ ស តារា