ភ្នំពេញ៖ សម្ដេចមហាពញាចក្រី ហេង សំរិន  ប្រធានរដ្ឋសភានៃកម្ពុជាបានអំពាវនាវឲ្យស្ថាប័ន រដ្ឋ ឯកជន យកចិត្ដ ទុកដាក់ លើកកម្ពស់ ស្ដ្រី ក្នុងវិស័យនយោបាយ  សេដ្ឋកិច្ច សង្គម  ការលើកកម្ពស់សមភាពយេនឌ័រ និងផ្ដល់សិទ្ធិអំណាចដល់ស្ដ្រី គឺស្មើ និងផ្ដល់កាលានុវត្ដភាពក្នុងការពង្រីកមុខរបរ និងកសាងសហគ្រិនភាព ជូនដល់ស្រ្ដី ក្នុងសង្គមគ្រួសារ ។ សម្ដេច ហេង សំរិន បានអំពាវនាវបែបនេះ ខណៈ សម្ដេចចូលរួមជាអធិបតីភាពក្នុងពិធីទិវាខូបទី១០៦ ទិវាអន្ដរជាតិនារី៨ មីនានៅរដ្ឋសភា នាព្រឹកថ្ងៃទី៦ មីនា ឆ្នាំ២០១៧ ។

សម្ដេច ហេង សំរិន បានបញ្ជាក់ថា៖ ពិធីរំលឹកខួបលើកទី១០៦ ទិវាអន្តរជាតិនារី ៨ មីនា ឆ្នាំ២០១៧ នេះប្រព្រឹត្តទៅក្រោមប្រធានបទ «ស្ត្រីដើម្បីសុខសន្តិភាពនិងវឌ្ឍនភាព» ជាប្រធានបទយ៉ាងល្អប្រពៃ ស្របតាមការដឹកនាំរបស់រាជរដ្ឋភិបាល បច្ចុប្បន្នកំពុងមានការអភិវឌ្ឍ ដែលស្ត្រីគ្រប់រូបបានឃើញស្រាប់និងបានឮគ្រប់ៗគ្នា។ ក្នុងឱកាសនោះសម្ដេចបានអំពាវនាវឲ្យ ស្ថាប័ន រដ្ឋឯកជន យកចិត្ដ ទុកដាក់ លើក កម្ពស់ស្ដ្រីក្នុងវិស័យ នយោបាយ  សេដ្ឋកិច្ច សង្គម  ការលើកកម្ពស់សមភាពយេនឌ័រ និងផ្ដល់សិទ្ធិអំណាចដល់ស្ដ្រី គឺស្មើនិងផ្ដល់កាលានុវត្ដភាពក្នុងការពង្រីកមុខរបរ និងកសាងសហគ្រិនភាព ជូនដល់ស្រ្ដី ក្នុងសង្គមគ្រួសារ ។

សម្ដេចបន្ដថា ៖  ប្រទេសកម្ពុជា ចាប់តាំងពីឆ្នាំ១៩៧៩ ដែលបន្ទាប់ពីបានរំដោះចេញពីរបបប្រល័យពូជសាសន៍ ប៉ុល ពត មក ថ្នាក់ដឹកនាំកំពូលរបស់គណបក្សប្រជាជនកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានកំណត់ឲ្យមានការប្រារព្ធពិធីរំលឹកខួប នៃការទទួលស្គាល់សិទ្ធិស្ត្រីនេះឡើង នៅតាមស្ថាប័នគ្រប់លំដាប់ថ្នាក់នៅទូទាំងប្រទេស រួមជាមួយនឹងការយកចិត្តទុកដាក់ ផ្តល់តម្លៃយ៉ាងខ្ពស់ពីរាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខ បានបង្កលក្ខណៈឲ្យមានការតែងតាំង ដំឡើងឋានៈ តួនាទីស្ត្រី ជាបន្តបន្ទាប់ និងបង្កើនអាយុចូលនិវត្តរបស់មន្ត្រីរាជការនិយោជិតនារី ដែលជាវិធានការបន្ទាន់ ដើម្បីលើកកម្ពស់ការចូលរួមរបស់ស្ត្រីនៅក្នុងសង្គមកម្ពុជា។

សម្ដេចបានបញ្ជាក់ថា៖ ក្នុងនាមយើងជាម្តាយ ត្រូវមានការណែនាំដល់កូនចៅ ពីផលប៉ះពាល់របស់គ្រឿងញៀន ក្នុងនោះការមិនគោរពច្បាប់ផងដែរ ដើម្បីកូនចៅរបស់យើងបានគេចផុតពីការប្រើប្រាស់គ្រឿងញៀន ហើយឈប់ចាញ់បោកពួកក្រុមជួញដូរគ្រឿងញៀន កសាងខ្លួនឲ្យបានទាន់ពេលវេលា ដើម្បីអនាគតក្រុមគ្រួសារយើង    ។

លោកស្រី អ៊ឹង កន្ថាផាវី  រដ្ឋមន្ដ្រី ក្រសួងកិច្ចការនារី បានបញ្ជាក់ថា៖ ទិវាអន្តរជាតិនារី ៨ មិនា ឆ្នាំ២០១៧នេះ ពិតជាមានអត្ថន័យណាស់ ដោយកម្ពុជាបានជ្រើសរើស ប្រធានបទ «ស្ត្រីដើម្បីសុខសន្តិភាពនិងវឌ្ឍនភាព»  ក្នុងគោលបំណងរំលឹកពី ការតស៊ូរបស់នារីទូទាំង ពិភពលោក ក្នុងការទាមទារសិទ្ធិសេរីភាព ប្រជាធិបតេយ្យ និងការអនុវត្តសិទ្ធិស្មើគ្នា រវាងបុរស និងស្ត្រី ហើយក៏មានស្នាដៃ និងសមិទ្ធផលនានាដូចគ្នាទៅនឹងបុរសដែរ។ ក្នុងរយៈពេលជាច្រើនឆ្នាំចុងក្រោយនេះ ស្ត្រីមានសិទ្ធិគ្រប់គ្រាន់ មានតួនាទីធំៗ នៅតាមអង្គភាពសំខាន់ៗ គ្រប់អង្គភាពរបស់ រាជរដ្ឋាភិបាល។

លោកស្រី បន្តថា ៖ ក្រសួងកិច្ចការនារី បានបំផុស និងកៀរគរប្រជាពលរដ្ឋឲ្យរួមគ្នាដើម្បីឈានទៅសម្រេចបាន នូវសកម្មភាពពិតប្រាកដ រវាងបុរស និងស្ត្រី ហើយអាជ្ញាធរនៅគ្រប់ ខេត្ដ ក្រុង   ត្រូវប្ដេជ្ញាចិត្ត ដ៏ខ្ពស់ក្នុងការដោះស្រាយបញ្ហារបស់ស្ត្រី អំពីភាពក្រីក្រ អំពីការអប់រំសុខ ភាព អំពើហិង្សា នារីក្នុងរចនាសម្ព័ន្ធ  នយោបាយ និងសេដ្ឋកិច្ច តួនាទីនារីក្នុងការធ្វើសេចក្តីសម្រេចចិត្តយន្តការលើកកម្ពស់ការរីកចម្រើនរបស់នារី សិទ្ធិរបស់នារី នៅក្នុងប្រព័ន្ធផ្សព្វផ្សាយនិងបានអញ្ជើញតំណាងនារី ចូលរួមរាល់កម្មវិធីនានា ក្នុងន័យឲ្យស្រ្តីមានតួនាទីស្មើគ្នា  និងអនុញ្ញាតឲ្យនារីដោះស្រាយកិច្ចការផ្សេងៗ តាមមូលដ្ឋាន បានប្រាស្រ័យជាមួយប្រជាពលរដ្ឋគ្រប់រូបភាព៕ សំរិត