ភ្នំពេញ៖ ជនសង្ស័យ៤នាក់ខណៈដែលពួកគេកំពុងជិះម៉ូតូ ត្រូវបានកម្លាំងសមត្ថកិច្ចខណ្ឌចំការមន កំពុងតែល្បាតតាមដងផ្លូវក៏ប្រទះឃើញ ជនសង្ស័យ៤នាក់ មានការសង្ស័យ ក៏ធ្វើការ ឃាត់ខ្លួនសាកសួរ ក៏ស្រាប់តែជនសង្ស័យ៤នាក់នោះ បានព្យាយាមជិះគេចពីកម្លាំងសមត្ថកិច្ច ពេលនោះសមត្ថកិច្ចបានដេញតាមពីក្រោយ ឃាត់ខ្លួនបានជនសង្ស័យ២នាក់ក្នុងចំណោម៤នាក់នោះ និងម៉ូតូ២គ្រឿង រួមទាំងសោរសម្រាប់កាចករម៉ូតូ២ផងដែរ ។ ហេតុការណ៍នេះ កើតឡើងកាលពីវេលាម៉ោង២និង៣០នាទីយប់នាថ្ងៃទី២០ ខែសីហា ឆ្នាំ២០១៥ ចំណុចផ្លូវ៣៦០ សង្កាត់បឹងកេងកង៣ ខណ្ឌចំការមន ក្បែរនិងរងយន្តពន្លត់អគ្គីភ័យ ។

សមត្ថកិច្ចបានប្រាប់អោយដឹងថា ជនសង្ស័យបទាំង២នាក់ខាងលើ ទី១ឈ្មោះឌី វណ្ណា ភេទប្រុស អាយុ២១ឆ្នាំ ស្នាក់នៅម្ដុំទួលសង្កែ(ផ្សារតូច) សង្កាត់ទួលសង្កែ ខណ្ឌឬស្សីកែវ និងមុខរបររើសអាតចាយ។ ទី២ ឈ្មោះ សុខ នី ភេទប្រុស អាយុ១៨ឆ្នាំ ស្នាក់នៅម្ដុំផ្សារកណ្ដាល សង្កាត់ផ្សារកណ្ដាល១ ខណ្ឌដូនពេញ និងមុខរបរជាងដែក ។

សមត្ថកិច្ចបានបន្តប្រាប់អោយដឹងបន្ថែមទៀតថា មុនពេលកើតហេតុ សមត្ថកិច្ចខណ្ឌចំការមនកំពុងល្បាតក្នុងមូលដ្ឋាន នៅម្ដុំផ្សារដើមថ្កូវ ក៏ប្រទះឃើញ ជនសង្ស័យ៤នាក់ ជិះម៉ូតូ២គ្រឿង  ម៉ាកណៃហត១គ្រឿង ពណ៌ខ្មៅ គ្មានស្លាកលេខ និង១គ្រឿងទៀត ម៉ាកឃ្លីក ពណ៌ខ្មៅក្រហម ពាក់ស្លាក់លេខ ព្រៃវែង 1A-2764 បានធ្វើតាមបណ្ដោយផ្លូវ២៧១ ដោយមានការសង្ស័យពីកម្លាំងសមត្ថកិច្ច ជនសង្ស័យទាំង៤នាក់ បានព្យាយាមជិះគេចពីកម្លាំងសមត្ថកិច្ចបានដេញតាមជនសង្ស័យ រហូតដល់ចំណុចផ្លូវ៣៦០ ជនសង្ស័យបានផ្ដួលម៉ូតូរត់ ទើបកម្លាំងសមត្ថកិច្ចឃាត់ខ្លួនបានជនសង្ស័យ២នាក់ និង២នាក់ទៀតបានរត់គេចខ្លួនបាត់ស្រមោលតែម្ដង ។

បច្ចុប្បន្ន ជនសង្ស័យ២នាក់រួមទាំងវត្ថុតាង ត្រូវបានកម្លាំងសមត្ថកិច្ចនាំយកទៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូនខ្លួនទៅតុលាការចាត់ការតាមនីតិវិធីច្បាប់ ៕

ដោយ៖ ស រស្មី