ភ្នំពេញ៖ ក្មេងប្រុសសិស្សសាលាគោកបញ្ជាន់ម្នាក់ ឆ្លៀតពេលទំនេរពីការសិក្សាបានដើរលេងនៅមាត់ស្រះ ទឹកជាមួយមិត្តភក្ដិ៤ទៅ៥នាក់ទៀត ខណៈពេលនោះស្រាប់តែមានមិត្តភក្ដិម្នាក់ របូតស្បែកជើងធ្លាក់ ចូលទៅក្នុងស្រះទឹកនោះដែលមានជម្រៅជាង៥ម៉ែត្រ ឃើញបែបនេះក្មេងប្រុសខាងលើ បានលោតចុះទៅយកស្បែកជើងឲ្យមិត្តភក្ដិ ហើយក៏បានលង់ទឹក ដោយឡែកមិត្តភក្ដិម្នាក់ ពេលឃើញក្មេងប្រុស នោះលង់ទឹកក៏បានលោតចុះទៅជួយ ហើយក៏បានលង់ទឹកដែរ។ ប៉ុន្តែត្រូវបានមិត្តភក្ដិម្នាក់ទៀតលោតចុះទៅជួយទាន់រួចផុតពីសេចក្ដីស្លាប់ និងបានស្រែកឲ្យអ្នកនៅជិតនោះជួយក្មេងរងគ្រោះបង្កឲ្យមានការភ្ញាក់ផ្អើល ហើយអ្នកជិតខាងបានរត់ទៅជួយដែរ ប៉ុន្តែជួយមិនទាន់ក្មេងប្រុសនោះក៏បានលិចបាត់ទៅក្នុងទឹកតែម្ដង។
ហេតុការណ៍នោះបានកើតឡើង កាលពីវេលាម៉ោង៨និង៤៥នាទីព្រឹកថ្ងៃទី២២ ខែមីនា ឆ្នាំ២០១៧ នៅក្នុង ស្រះទឹកក្នុងវត្តគោបញ្ជាន់ ស្ថិតនៅក្នុងភូមិគោកបញ្ជាន់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
សពត្រូវបានប្រជាពលរដ្ឋ នាំគ្នាចុះរាវរកជាច្រើនម៉ោងតាមរយៈការអូសអួន ប៉ុន្តែមិនបានឃើញនោះឡើយ លុះក្រោយមកបានជួលជនជាតិខ្មែរឥស្លាមក្នុងតម្លៃ៣០០ដុល្លារឲ្យចុះរាវរក ហើយត្រឹមតែ១៥នាទីប៉ុណ្ណោះក៏បានប្រទះឃើញសពក្មេងប្រុសរូបនោះ។
តាមប្រភពព័ត៌មានបានឲ្យដឹងថា ក្មេងប្រុសរងគ្រោះខាងលើនោះ ឈ្មោះទ្រី សុបញ្ញា អាយុ១៣ឆ្នាំ ជាសិស្សសាលាបឋមសិក្សាគោកបញ្ជាន់ មានម្តាយឈ្មោះ ប៊ុន ស្រីនី អាយុ៣៥ឆ្នាំ និងឪពុកឈ្មោះ ទ្រី សុខណា អាយុ៣៨ឆ្នាំ ជាកម្មករកម្មការិនីរោងចក្រកាត់ដេរ និងមានទីលំនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
តាមប្រភពពីកន្លែងកើតហេតុប្រាប់ថា នៅមុនពេលកើតហេតុខាងលើ ក្មេងប្រុសរងគ្រោះបានទៅរៀនប៉ុន្តែ ដោយសារតែលោកគ្រូប្រចាំថ្នាក់ ជាប់រវល់សុំច្បាប់មិនបានទៅបង្រៀន រូបគេនិងមិត្តភក្ដិ៤ទៅ៥នាក់ទៀត បាននាំគ្នាដើរលេងនៅមាត់ស្រះទឹកខាងលើ។ លុះមួយសន្ទុះក្រោយមកមានក្មេងប្រុសម្នាក់ដែលជាមិត្តភក្តិ បានជ្រុះស្បែកជើងធ្លាក់ចូលទៅក្នុងស្រះទឹកនោះ ក្មេងប្រុសរងគ្រោះក៏បានលោតចុះទៅយកស្បែកជើងឲ្យ ហើយក៏បានលង់ទឹក ភ្លាមៗនោះមិត្តភក្ដិម្នាក់ទៀត បានលោតចុះទៅជួយ ហើយក៏បានលង់ដែរ ប៉ុន្តែក៏មាន មិត្តភក្ដិម្នាក់ទៀត ជាជនទី៣លោតចុះទៅជួយអ្នកទី២រួចផុតពីសេចក្ដីស្លាប់ ចំណែកក្មេងប្រុសរងគ្រោះ គេជួយមិនទាន់ក៏បានលិចបាត់ទៅក្នុងទឹកតែម្ដង។
ដោយឡែកឪពុកម្ដាយរបស់ក្មេងប្រុសរូបនោះ បន្ទាប់ពីរកឃើញសពកូនប្រុស មានការរន្ធត់ចិត្តរហូតដល់សន្លប់បាត់ស្មារតី ចំណែកអ្នកដែលទៅចោមរោមមើលហេតុការណ៍នោះបានទុកម៉ូតូចោលមិនប្រយ័ត្ន ត្រូវបានចោរកាច់សោកម៉ូតូ១គ្រឿងយកទៅបាត់ដោយសុវត្ថិភាព ៕ សុខាសែនជ័យ
...
