ខេត្តកណ្តាល៖ ម៉ូតូមួយគ្រឿងម៉ាកហុងដាឌ្រីមធុនសេ១២៥បានបើកបុកគ្នាជាមួយម៉ូតូធុនសេ១០០កូរ៉េពេញមួយទំហឹងនៅលើកំណាត់ផ្លូវជាតិលេខ២ ខណៈកំពុងបើកបរក្នុងទិសដៅបញ្ច្រាសគ្នា បណ្តាលឲ្យអ្នកបើកបរម៉ូតូទាំង២គ្រឿងរងរបួសយ៉ាងធ្ងន់ធ្ងរ ហើយត្រូវបានរថយន្តសាមុយប្រចាំស្នងការដ្ឋាននគរបាលខេត្តកណ្តាលដឹកបញ្ជូនទៅសង្រ្គោះនៅមន្ទីរពេទ្យផងដែរ ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២១ និង ១០នាទីថ្ងៃទី២១ ខែសីហា ឆ្នាំ២០១៥ លើកំណាត់ផ្លូវជាតិលេខ២ ត្រង់ចំណុចខាងមុខរោងម៉ាស៊ីនកិនស្រូវរបស់ឈ្មោះ សោ សំអុល ស្ថិតក្នុងភូមិព្រែកហូរលិច១ សង្កាត់ព្រែកហូរ ក្រុងតាខ្មៅ ។
ឲមន្ត្រីនគរបាលចរាចរណ៍ក្រុងតាខ្មៅបានឲ្យដឹងថា ភាគីបង្កហេតុម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ គ្មានស្លាកលេខ បើកបរដោយឈ្មោះ ភិន រ៉ាដេត ភេទប្រុស អាយុ២៥ឆ្នាំ (រងរបួសធ្ងន់) មានទីលំនៅក្នុងភូមិព្រែកហូរកើត សង្កាត់ព្រែកហូរ ក្រុងតាខ្មៅ ។ ចំណែកឯភាគីរងគ្រោះឈ្មោះ ជា ធី ភេទប្រុស អាយុ៥៦ឆ្នាំ (រងរបួសធ្ងន់បាក់ភ្លៅខាងឆ្វេង) មានទីលំនៅក្នុងភូមិស្លែង ឃុំស្លែង ស្រុកកណ្តាលស្ទឹង ខេត្តកណ្តាល ជិះម៉ូតូធុនសេ១០០កូរ៉េ ពណ៌ក្រហម ពាក់ស្លាកលេខភ្នំពេញ 1AL-7658 ។
ឲប្រភពដដែលបានបន្តថា នៅមុនពេលកើតហេតុសាក្សីបានឃើញម៉ូតូម៉ាកហុងដាឌ្រីមបើកបរបោះពួយយ៉ាងលឿនតាមបណ្តោយផ្លូវជាតិលេខ២ក្នុងទិសដៅពីលិចទៅកើត ខណៈបើកដល់ចំណុចកើតហេតុបានជ្រុលចង្កូតផុតគំនូសពុះចែកទ្រូងផ្លូវ ចូលទៅបុកម៉ូតូធុនសេ១០០កូរ៉េដែលបើកបរក្នុងទិសដៅបញ្ច្រាសគ្នាពេញមួយទំហឹង ធ្វើឲ្យម៉ូតូទាំង២គ្រឿងដួលរណូករណែលនៅលើផ្លូវជាតិ បណ្តាលឲ្យរងរបួសធ្ងន់ទាំងសងខាងតែម្តង ។
ឲក្រោយពីមានហេតុការណ៍កើតឡើងជនរងគ្រោះទាំង២នាក់ ត្រូវបានរថយន្តសាមុយប្រចាំស្នងការដ្ឋាននគរបាលខេត្តកណ្តាលដឹក បញ្ជូនទៅសង្រ្គោះនៅគ្លីនិកឯកជនចាក់អង្រែ (គ្លីនិក៧០០០០២) ។ ដោយឡែកមធ្យោបាយពាក់ព័ន្ធទាំង២គ្រឿងត្រូវបានសមត្ថកិច្ចនគរបាលជំនាញចរាចរណ៍ក្រុងតាខ្មៅ ធ្វើការវាស់វែងដកហូតយកទៅរក្សាទុកបណ្តោះអាសន្ននៅអធិការដ្ឋាន ដើម្បីចាត់ការតាមច្បាប់ ។
ឲមន្ត្រីនគរបាលជំនាញដែលចុះទៅពិនិត្យកន្លែងកើតហេតុបានបញ្ជាក់ថា ករណីនេះបង្កដោយភាគីម៉ូតូហុងដាឌ្រីមបើកចូលចំណែកផ្លូវម៉ូតូធុនសេ១០០កូរ៉េ ទើបបណ្តាលឲ្យបុកគ្នាយ៉ាងដូច្នេះ ៕
ដោយ៖ ស្អាងជ័យ
