ភ្នំពេញ៖ បុរស២នាក់ត្រូវបានក្រុមអ្នកបើកតាក់សុីមែត្រព្រួតវាយប៉ោងភ្នែកនិងបាក់ធ្មេញដោយសារតែរឿងបើកភ្លើងហ្វាចាំងភ្នែកអ្នកទាំង២នោះដែលកំពុងតែផឹកស៊ីកើតជាជម្លោះវាយគ្នាទៅវិញទៅមកបង្កភាពរញេរញៃពេញផ្លូវ កាលពីវេលាម៉ោង១១និង២០នាទីយប់ថ្ងៃទី ២០ ខែមេសា ឆ្នាំ២០១៧ ត្រង់ចំណុចមុខផ្សារទំនើបស៊ុបភើស្តរ ស្ថិតតាមបណ្ដោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។

តាមប្រភពព័ត៌មានភាគីខាងម៉ូតូរ៉ឺមកបានឲ្យដឹងថា មុនពេលកើតហេតុរូបគាត់ទាំង២នាក់មានឈ្មោះនួន ភារម្យ ភេទប្រុស អាយុ២៨ឆ្នាំ មុខរបរអ្នករត់ម៉ូតូរ៉ឺមក ស្នាក់នៅភូមិពោងពាយ សង្កាត់ភ្នំពេញថ្មី ខណ្ឌសែនសុខ និងម្នាក់ទៀតមានឈ្មោះ ប៉ូយ ភេទប្រុស អាយុ២៧ឆ្នាំ មុខរបររោងចក្រ ស្នាក់នៅភូមិពោងពាយ សង្កាត់ភ្នំពេញថ្មី ខណ្ឌសែនសុខ ដែលកំពុងអង្គុយផឹកសុីលើម៉ូតូរ៉ឺមករបស់ខ្លួននោះហើយស្រាប់តែពេលនោះមានខាងតាក់សុីមែត្រChoice ពណ៌លឿងមួយគ្រឿងបានបើកមកឈប់ក្បែរកន្លែងរបស់គាត់ទាំង២នាក់នោះផឹកសុីហើយខណៈពេលដែលពួកគាត់កំពុងតែជជែកគ្នាឮៗថា «អីគ្រាន់តែផឹកប៉ុណ្ណឹងស្រវឹង សង្ស័យតែខាងអ្នកបើកបររថយន្តស្ដាប់ច្រឡំក៏បានឮហើយស្រែកមកវិញថា អាញ់ផឹកប៉ុណ្ណឹងអត់ទាន់ស្រវឹងទេវើយហើយខាងរថយន្តតាក់សុីបានបន្តថា ហែងនឹងស្អីហា អាញ់មានគ្នាអាញ់» ស្រាប់តែបន្តិចក្រោយមកបក្ខពួកខាងរថយន្តតាក់សុីបានមកដល់ចំនួន៣ឡានហើយបានចុះពីឡានស្ទុះមកព្រួតវាយអ្នកទាំង២នាក់នោះបណ្ដាលឲ្យម្នាក់បាក់ធ្មេញ និងប៉ោងភ្នែក ចំណែកឯម្នាក់ទៀតប៉ោងមុខមាត់ដែរ ។

បើតាមសម្ដីភាគីម្ខាងទៀតដែលជាអ្នកបើកបររថយន្តតាក់សុីមែត្រChoiceនោះមានឈ្មោះ នឿន សុីនឿន ភេទប្រុស ស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ បានឲ្យដឹងថា មុនពេលកើតហេតរូបគាត់បានបើករថយន្តចូលទៅរកទិញអីនៅក្នុងម៉ាត តេលា ដែលនៅពីមុខទីតាំងកើតហេតុខាងលើហើយក្រោយមកអ្នកបើកបរខាងលើដោយគាត់មិនសូវជាស្រួលខ្លួនក៏បានបើករថយន្តបំណងចតឈប់សម្រាកដើម្បីរងចាំយកភ្ញៀវ ខណៈពេលដែលគាត់បានបើករថយន្តមកជិតកន្លែងអ្នកទាំងពីរនាក់ខាងលើកំពុងតែផឹកសុីនោះស្រាប់តែភ្លើងហ្វារថយន្តបានចាំងទៅចំគាត់ទាំងពីរនាក់ធ្វើឲ្យបុរសម្នាក់ក្នុងចំណោម២នាក់នោះបានដើរសំដៅមកឡានរបស់គាត់ហើយប្រើអាក្បកិរិយាមិនគួរសមដាក់គាត់ហើយថែមទាំងប្រមាថដល់គាត់ជាអ្នករត់តាក់សុីទៀតផង តែពេលនោះដោយមិនចង់ប្រកាន់ជាមួយនិងអ្នកស្រវឹងទើបគាត់បានប្រាប់ទៅអ្នកទាំង២នាក់នោះថា ស្រវឹងហើយទៅៗ ហើយភ្លាមនោះភ្ញៀវរបស់អ្នករត់តាក់សុីបានទូរស័ព្ទមកឲ្យទៅដឹកគេ ហើយម្ចាស់រថយន្តបានបើកទ្វារចូលក្នុងរថយន្តស្រាប់តែខាងម៉ូតូរ៉ឺមកមកធាក់ទ្វាររថយន្តរបស់គាត់ធ្វើឲ្យគាត់ខឹងទើបស្ទុះទៅវាយអ្នកទាំងពីរនាក់នោះបណ្ដាលឲ្យម្នាក់បាក់ធ្មេញ និងម្នាក់ទៀតរងរបួសបន្តិចបន្តួច ហើយក្រោយមកគេឃើញមានបក្ខពួកខាងរថយន្តតាក់ស៊ី ជាច្រើនគ្រឿងដើម្បីមកជួយដោះស្រាយគ្នា។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុហើយបាននាំខ្លួនអ្នកទាំងអស់នោះមកកាន់អធិការដ្ឋានខណ្ឌសែនសុខដើម្បីធ្វើការឃាត់ខ្លួនរងចាំការសាកសួរនិងចាត់ការតាមនីតិវិធី ៕ តុង សីហា