ភ្នំពេញ៖ បុរសជនជាតិចិន២នាក់ភ័យលោះព្រលឹង ខណៈកំពុងជិះម៉ូតូតាមផ្លូវ មិនដឹងជាឆ្លងចរន្តឬមួយយ៉ាងណា ស្រាប់តែមានផ្កាភ្លើងឆាបឆេះម៉ូតូកណ្តាលផ្លូវផ្អើលអ្នកធ្វើដំណើរតែម្តង។ ហេតុការណ៍ខាងលើបានកើតឡើងកាលពីវេលាម៉ោង១២ និង៥០នាទីព្រឹកថ្ងៃទី២៥ ខែមេសា ឆ្នាំ២០១៧ លើកំណាត់ផ្លូវសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

អ្នកឃើញហេតុការណ៍បានឲ្យដឹងថា នៅវេលាដូចខាងលើ គេបានឃើញបុរសជនជាតិចិន២នាក់ បានជិះម៉ូតូម៉ាកStep ពណ៌ស ពាក់ស្លាកលេខភ្នំពេញ1AC-6445 ក្នុងទិសដៅពីកើតទៅលិច តាមបណ្តោយផ្លូវសហព័ន្ធរុស្ស៊ី លុះមកដល់កន្លែងកើតហេតុក៏មានអគ្គិភ័យនេះឆាបឆេះយ៉ាងសន្ធោសន្ធៅ។ ឃើញបែបនេះគេក៏បានជួយយកបំពុងអគ្គិភ័យបាញ់ពន្លត់ដើម្បីកុំឲ្យរាលដាលឆេះប៉ះពាល់ទៅលើសម្ភារ របោះរបរអ្នកដទៃ។

ឆ្លងចរន្តភ្លើងបណ្តាលឲ្យឆេះម៉ូតូខាងលើនេះ សំណាងល្អផងដែរ ដែលមិនបានបង្កគ្រោះថ្នាក់ទៅលើជនរងគ្រោះក៏ដូចជាអ្នកធ្វើដំណើរកំពុងមានមនុស្សច្រើនតាមដងផ្លូវ៕ តុង សីហា