ភ្នំពេញ៖ ជនសង្ស័យ២នាក់ បានជិះម៉ូតូឌុបគ្នាធ្វើសកម្មភាពឆក់ទូរស័ព្ទដៃពីនារីម្នាក់បានសម្រេច បង្កឲ្យមានការភ្ញាក់ផ្អើលដល់សមត្ថកិច្ចនៅវេលាម៉ោង៧និង៤០នាទីយប់ ថ្ងៃទី២៥ ខែមេសា ឆ្នាំ២០១៧ នៅជាប់ស្ពានដែកចំការដូង ស្ថិតក្នុងភូមិម័ល សង្កាត់ដង្កោ ខណ្ឌដង្កោ ដេញចាប់ជនសង្ស័យតែចាប់មិនបានបែរជាចាប់ច្រឡំ។

នារីរងគ្រោះមានឈ្មោះហៀង ស្រីអូន  អាយុ២៥ឆ្នាំ មុខរបរលក់បន្លែមុខរោងចក្រ ស្នាក់នៅផ្ទះជួលក្នុងភូមិឫស្សីសង្កាត់ស្ទឹងមានជ័យ ខណ្ឌមានជ័យ និងជិះម៉ូតូម៉ាកនិចពណ៌ស ពាក់ស្លាកលេខភ្នំពេញ1CS-3344។

បើតាមការរៀបរាប់ពីនារីរងគ្រោះខាងលើបានប្រាប់ឲ្យដឹងថា នៅមុនពេលកើតហេតុ គឺគាត់បានជិះម៉ូតូមកពីភូមិម័ល (មកពីទិញសាប៊ូរ) ដោយជិះតម្រង់មកផ្ទះវិញនៅភូមិឫស្សី ខណៈជិះម៉ូតូដល់ស្ពានដែក ក៏លេចមុខជនសង្ស័យ២នាក់ជិះម៉ូតូម៉ាកនិច មិនចាំស្លាកលេខ ដោយចាំបានថា ពាក់អាវខ្មៅម្នាក់ ហើយឌុបគ្នាមកពីក្រោយ ក៏បានធ្វើសកម្មភាពឆក់ទូរស័ព្ទដៃម៉ាកអាយហ្វូនហ្វាយ ពីនារីរងគ្រោះដែលរូបគាត់បានទុកទូរស័ព្ទនៅក្នុងក្លុបម៉ូតូមុខ បានសម្រេច ហើយជនសង្ស័យបានជិះម៉ូតូរត់តម្រង់មកច្រមុះជ្រូកស្ទឹងមានជ័យវិញ ដោយភ្លាមៗនារីរងគ្រោះក៏បានស្រែកថាចោរៗ បង្កឲ្យភ្ញាក់ផ្អើលដល់សមត្ថកិច្ចប៉ុស្ដិ៍ស្ទឹងមានជ័យ ដែលកំពុងល្បាតជួយដេញតាមចាប់ តែសំណាងមិនល្អចាប់មិនបាន បានតែយុវជន៣នាក់ជិះម៉ូតូអត់កញ្ចក់តែប៉ុណ្ណោះ ។

ក្រោយកើតហេតុ យុវជនទាំង៣នាក់ត្រូវបានសមត្ថកិច្ចដោះលេងឲ្យត្រឡប់ទៅវិញព្រោះតែច្រឡំ ហើយនារីរងគ្រោះក៏បានជិះម៉ូតូទៅដាក់ពាក្យបណ្ដឹងនៅប៉ុស្ដិ៍សមត្ថកិច្ចនគរបាលដង្កោវិញផងដែរ ៕ ជីម ភារ៉ា