ភ្នំពេញ៖ ស្ត្រីម្នាក់ជិះម៉ូតូចេញពីធ្វើការត្រូវបានជនសង្ស័យពីរនាក់ជិះម៉ូតូកៀឲ្យឈប់ ហើយដកកាំភ្លើងភ្ជង់ប្លន់យកទាំងម៉ូតូនិងកាបូបលុយ រួចជិះគេចខ្លួនដោយសុវត្តិភាព ។

ហេតុការណ៍នេះកើតឡើងកាលពីវេលាម៉ោង១៦និង៣០នាទីរសៀលថ្ងៃទី២៥ ខែកញ្ញា ឆ្នាំ២០១៥ នៅចំណុចក្រោយសាលាកសិកម្មចំកាដូង ស្ថិតក្នុងភូមិខ្វា សង្កាត់ដង្កោ ខណ្ឌដង្កោ ។ ស្ត្រីរងគ្រោះមានឈ្មោះជួប សុភា អាយុ២៩ឆ្នាំ មុខរបរមន្ត្រីមន្ទីរការងារ រស់នៅភូមិខ្វា សង្កាត់-ខណ្ឌដង្កោ ។

ប្រភពព័ត៌មានពីស្ត្រីរងគ្រោះខាងលើបានប្រាប់ថា  មុនពេលកើតហេតុនៅវេលាម៉ោង១៦និង៣០នាទី គាត់បានជិះម៉ូតូម៉ាកហ្វីឡាណូ ពណ៌ក្រហម ពាក់ស្លាកលេខ ភ្នំពេញ1NC-4211និងស្ពាយកាបូបលុយជាប់និងខ្លួនផងដែរ ហើយបានជិះចេញពីកន្លែងធ្វើការដើម្បីមកផ្ទះពេលជិះមកដល់ចំណុចកើតហេតុខាងលើ ក៏ស្រាប់តែមានម៉ូតូវីវ៉ាមួយគ្រឿងពណ៍ខ្មៅ មិនចាំស្លាកលេខ ជិះគ្នាពីរនាក់មិនស្គាល់អត្តសញ្ញាណបានជិះមកកៀម៉ូតូជនរងគ្រោះហើយស្រែកអោយឈប់ និងគំរាមយកកាបូបលុយ តែជនរងគ្រោះមិនព្រម រួចវាក៏ដកកាំភ្លើងភ្ជង់ជនរងគ្រោះរួចយកម៉ូតូនិង
កាបូបលុយជិះគេចខ្លួនបាត់តែម្តង ។

ប្រភពដដែលបានឲ្យដឹងថា សម្ភារៈដែលបាត់បង់រួមមានម៉ូតូ០១គ្រឿង កាតគ្រីឡាន០១ កាតគ្រីម៉ូតូ០១ អត្តសញ្ញាណប័ណ្ណ០២សន្លឹក ទូរស័ព្ឋ០២គ្រឿង លុយ៣០០ដូល្លា និងកាតអេធីអិម ០២សន្លឹក ។

ក្រោយពេលកើតហេតុជនរងគ្រោះបានទៅដាក់ពាក់បណ្ដឹងនៅប៉ុស្តិ៍នគរបាលរដ្ឋាបាលខណ្ឌដង្កោ ដើម្បីឲ្យសមត្ថកិច្ចងាយស្រួលរកមុខសញ្ញាតាមចាប់ជនសង្ស័យមកដាក់ទោសតាមផ្លូវច្បាប់ ៕

ដោយ៖ ភារ៉ា ដង្កោ