ភ្នំពេញ៖ យុវជនជានិស្សិតម្នាក់ដួលបោកក្បាលស្លាប់ភ្លាមនៅកន្លែងកើតហេតុ បន្ទាប់ពីបើកបរម៉ូតូឆ្លងផ្លូវ ហើយចៃដន្យទាក់ដៃចង្កូតជាមួយរថយន្តដឹកសំរាមក្រុមហ៊ុនស៊ីនទ្រីបណ្តាលឲ្យរបូតមួក ហើយដួលបោកក្បាលនឹងថ្នល់ស្លាប់ភ្លាមៗតែម្តង ។
ហេតុការណ៍នេះបានកើតឡើង១និង៤០នាទីរសៀល ថ្ងៃទី៣០ ខែកញ្ញា ឆ្នាំ២០១៥ ស្ថិតនៅផ្លូវលេខ២៧១ ក្បែរវិទ្យាល័យជាស៊ីមសាមគ្គី សង្កាត់បឹងសាឡាង ខណ្ឌទួលគោក រាជធានីភ្នំពេញ ។
ជនរងគ្រោះឈ្មោះ អ៊ុន ប៊ុនទិត្យា ភេទប្រុស អាយុ២៧ឆ្នាំ ជានិស្សិត ស្នាក់នៅផ្ទះគ្មានលេខ ផ្លូវនរោត្តម សង្កាត់ទន្លេបាសាក ខណ្ឌចំការមន រាជធានីភ្នំពេញ ។ ជិះម៉ូតូម៉ាកហុងដាវ៉េវ អាហ្វា ពណ៌ខ្មៅ ពាក់ស្លាកលេខ ភ្នំពេញ 1CM-2912 ។
ពលរដ្ឋដែលឃើញហេតុការណ៍បញ្ជាក់ថា មុនពេលកើតហេតុ រថយន្តដឹកសំរាមស៊ីនទ្រីបើកតាមបណ្តោយផ្លូវ២៧១ ពីកើតទៅលិច ចំណែកជនរងគ្រោះធ្វើដំណើរពីលិចមកកើតបញ្ច្រាស់ទិសគ្នា ហើយមានបំណងជិះឆ្លងផ្លូវមកខាងស្តាំដៃវិញ ក៏ជ្រុលចង្កូតប៉ះជាមួយរថយន្តបណ្តាលឲ្យដួលបោករបូតមួកសុវត្ថិភាព បោកក្បាលស្លាប់ភ្លាមៗតែម្តង ។
ក្រោយកើតហេតុ អ្នកបើកបររថយន្តបង្ក រួមទាំងកម្មករប្រមូលសំរាមធ្វើដំណើរជាមួយគ្នានោះបានរត់គេចខ្លួន បន្សល់ទុករថយន្តនៅកន្លែងកើតហេតុ ។ សមត្ថកិច្ចនគរបាលបានចុះពិនិត្យដល់កន្លែងកើតហេតុ វាស់វែង រួចយករថយន្ត និងម៉ូតូទៅរក្សាទុកនៅស្នងការនគរបាលរាជធានីភ្នំពេញដើម្បីស្រាវជ្រាវ និងដោះស្រាយបន្ត ៕
ដោយ៖ ស ដារ៉ា
