ខេត្តកំពង់ឆ្នាំង៖ យុវជនម្នាក់ បានរងរបួសធ្ងន់ បន្ទាប់ពីត្រូវរថយន្តបុពេញទំហឹង គ្រាដែលកំពុងរត់ឆ្លងថ្នល់ កាលពីព្រឹក ថ្ងៃទី១១ ខែមិថុនា
ឆ្នាំ២០១៧ លើផ្លូវជាតិលេខ៥ ក្នុងភូមិក្បាលថ្នល់ ឃុំផ្សារ ស្រុកបរិបូណ៍ ខេត្តកំពង់ឆ្នាំង។

សមត្ថកិច្ចបានឲ្យដឹងថា ជនរងគ្រោះឈ្មោះ ប៊ិច ចាន់គារិត ភេទប្រុស អាយុ២៣ឆ្នាំ រស់នៅភូមិឃុំខាងលើ។ ប្រភពបន្តថា មុនពេលកើតហេតុយុវជនរងគ្រោះ បានរត់ឆ្លងថ្នល់ ក៏ត្រូវរថយន្ត១គ្រឿង ម៉ាកកាមរីឆ្លាម ពណ៌ស្ករ ពាក់ស្លាកលេខ ភ្នំពេញ2I.42 20 ទិសដៅពីជើងទៅត្បូង បុកចំយ៉ាងពេញទំហឺង បណ្តាលឲ្យរបួសធ្ងន់តែម្តង។

ក្រោយពេលកើតហេតុ ជនរងគ្រោះត្រូវបានបងប្អូនដឹកយកទៅសង្គ្រោះនៅមន្ទីរពេទ្យខេត្តកំពង់ឆ្នាំង។ ចំណែករថយន្តបានយកទៅរក្សារទុកនៅអធិការនគបាលស្រុកបរិបូណ៍ ដើម្បីដោះស្រាយតាមច្បាប់៕ចន្ថា