ខេត្តកំពង់ចាម ៖ លោកឧត្តមសេនីយ៍ ស្នងការ ឯម កុសល បានបញ្ជាក់ឲ្យដឹងថា នៅវេលាម៉ោង៣រសៀល ថ្ងៃទី៥ ខែកក្កដា ឆ្នាំ២០១៧ កម្លាំងផ្នែកគ្រឿងញៀនរបស់អធិការដ្ឋាននគរបាលស្រុកកំពង់សៀម បានទទួលពត៌មានពីភ្នាក់ងារផ្តល់ពត៌មានតាមទូរសព្ទ័ថា មានរថយន្តមួយគ្រឿងម៉ាកហ៊ីយ៉ានដាយ ពណ៌ស ពាក់ស្លាកលេខ កំពង់ចាម 3A 2739 ដឹកគ្រឿងញៀនទុកចែកចាយដែលធ្វើដំណើរក្នុងគោលដៅពីភូមិស្ពឺ ទៅអ្នកលឿង បន្ទាប់ពីទទួលពត៌មាន កម្លាំងជំនាញគ្រឿងញៀន បានសហការជាមួយកម្លាំងប៉ុស្តិ៍អូរស្វាយ ជំនាញចរាចរណ៍ស្រុក និងកម្លាំងជំនាញគ្រឿងញៀនខេត្ត ធ្វើការឃាត់រថយន្តបាននៅមុខអធិការដ្ឋាន ស្ថិតក្នុងភូមិអំពិលលើ ឃុំអំពិល ស្រុកកំពង់សៀម
ឃាត់ខ្លួនជនសង្ស័យបានចំនួន២នាក់ ៖
1-ឈ្មោះ យឹម គីមស៊ា ហៅ ង៉ោ ភេទប្រុស អាយុ 29ឆ្នាំ នៅភូមិស្ពឺ ឃុំស្ពឺ ស្រុកចំការលើ ខេត្តកំពង់ចាម
2-ឈ្មោះ សៅ ស្រីនាង ភេទស្រី អាយុ 28ឆ្នាំ នៅភូមិសាលាតាព្រហ្ម ឃុំបឹងខ្យាង ស្រុកកណ្តាលស្ទឹង ខេត្តកណ្តាល។ រឹបអូសបានម្សៅក្រាមសសង្ស័យជាថ្នាំញៀនចំនួន 02កញ្ចប់ (ធំចំនួន 1កញ្ចប់ តូចចំនួន 01កញ្ចប់) ជញ្ជីងអេឡិចត្រូនិច១គ្រឿង ឧបករណ៍វេចខ្ចប់មួយចំនួន ឧបករណ៍ប្រើប្រាស់ថ្នាំញៀនមួយសម្រាប់ ទូរសព្ទ័ចំនួន 03គ្រឿង ប្រាក់រៀល ប្រាក់ដុល្លា ប្រាក់ដុងមួយចំនួន។
ប្រភពពីមន្រ្តីនគរបាលជាន់ខ្ពស់ក្នុងខេត្តម្នាក់បានឲ្យដឹងថា ជនសង្ស័យខាងលើកន្លងទៅក៏ធ្លាប់ត្រូវបាននគរបាលជំនាញចាប់ខ្លួនបានម្តងរួចមកហើយក្នុងករណីដូចគ្នាអ៊ីចឹង បើករថយន្តយីឌុបដើរលក់អ៊ីចឹង? ហើយឥឡូវក៏ចាប់ខ្លួនបានដដែលៗអញ្ចឹង?
បច្ចុប្បន្នជនសង្ស័យទាំងពីរនាក់ រួមទាំងវត្ថុតាង ត្រូវបានឃាត់ខ្លួនបណ្តោះអាសន្ន និងរក្សាទុកនៅអធិការដ្ឋាន ជំនាញកំពុងស្រាវជ្រាវបន្ត ៕ វណ្ណៈ
