ភ្នំពេញ៖ កាលពីវេលាម៉ោង១និង៣០នាទីយប់ ឈានចូលថ្ងៃទី៧ ខែតុលា ឆ្នាំ២០១៥ នៅតាមបណ្តោយផ្លូវ១៨២ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។ ដោយមានករណីគ្រោះថ្នាក់ចរចារណ៍មួយបានកើតឡើងតែមិនបណ្តាលឱ្យមានអ្នករងរបួសនោះទេ ។

ប្រភពព័ត៌មានពីសមត្ថកិច្ចបានប្រាប់អោយដឹងថា មានបុរសស្រវឹងមួយក្រុម មានគ្នាប្រមាណ៥ បានបើកបររថយន្តមួយគ្រឿងម៉ាក Escalade ពណ៌ខ្មៅមួយគ្រឿង អត់ស្លាកលេខ បានបើកបរក្នុងទិសដៅពីជើងទៅត្បូង ក៏ជ្រុលទៅបុកនឹងរថយន្ត Lexus 470 ពណ៌ខ្មៅ ​ដែលមានស្លាក លេខភ្នុំពេញ 2C-9594 ដែលគេស្គាល់ថាជាតារាភាពយន្ត លោក សុវណ្ណ​​ មករា ដែលរួមដំណើរជាមួយ តារាចំរៀងលោក សាពួន មីដាដា ដោយបើកបរក្នុងទិសដៅពីកើតទៅលិច ដែលជាចំណុចផ្លូវបែកជាបួន ។

ក្រោយកើតហេតុបុរសដែលជាអ្នកបើករថយន្តបង្កនោះ មិនបាននិយាយសុំទោស ទៅកាន់តារាសម្តែងនោះទេ ដោយថែមទាំងនិយាយខ្លាំងថាខ្លួនជាកូនមន្ត្រីយោធាមួយរូប។ ក្រោយមកដោយសារអ្នកឃើញហេតុការណ៍នេះបាននាំគ្នានិយាយទៅកាន់បុរស ដែលជាកូនមន្ត្រីយោធាម្នាក់នោះថា រថយន្តរបស់ខ្លួនបើកមកបុកគេហើយរករឿងគេទៀត ។

ដោយឮពាក្យរបស់អ្នកឃើញហេតុការណ៍នេះថាឲ្យស្ទើរតែគ្រប់គ្នា ទើបបុរសដែលជា កូនមន្ត្រីយោធារូបនោះ​ស្ងាត់មាត់ ហើយបានដើរទៅសុំទោស តារាចំរៀង និងតារាសម្តែងទាំងពីរ បន្ទាប់មកដោយសារតែរថយន្តរបស់លោក សុវណ្ណ​ មករា មិនមានរងការខូចខាតធ្ងន់ធ្ងរទើប បានឲ្យរថយន្តកូនមន្ត្រីយោធារូបនោះចេញទៅដើម្បីកុំឱ្យមានរឿងវែងឆ្ងាយ ៕

ដោយ៖ សរ រស្មី