សារព័ត៌មាន Bangkokpost បានផ្សាយថា រដ្ឋាភិបាលថៃមានគម្រោងដកហូតទ្រព្យសម្បត្តិរបស់អតីតនាយករដ្ឋមន្ត្រីលោកស្រីយីងឡាក់ស៊ីណាវ៉ាត្រា សម្រាប់យកទៅសងសំណង ខូចខាតដោយដារតែកម្មវិធីផ្តល់ជំនួយទិញស្រូវអង្កររបស់រដ្ឋាភិបាលក្រោមការដឹកនាំរបស់លោកស្រី ។
ឧបនាយករដ្ឋមន្ត្រីថៃ លោក Wissanu Krea ngam បានបកស្រាយថា ច្បាប់ខាងលើត្រូវអនុវត្តពឹងផ្អែកទៅលើការស្រាវជ្រាវរបស់គណៈកម្មការប្រឆាំងអំពើពុករលួយ NACC ក្នុងនោះ បានបង្ខំឲ្យរដ្ឋាភិបាលរបស់លោកស្រីយីងឡាក់ត្រូវតែទទួលខុសត្រូវចំពោះគោលនយោបាយដែលបានធ្វើឲ្យប្រទេសជាតិត្រូវខាតបង់ ។
ភ្លាមៗនោះ លោកស្រីយីងឡាក់ ក៏បានប្រតិកម្មនៅតាមបណ្តាញសង្គមហ្វេសប៊ុករបស់លោកស្រីថា រដ្ឋាភិបាលកំពុងតែធ្វើសកម្មភាពដូចជាតុលាការ ។ លោកស្រីយីងឡាក់ បញ្ជាក់ថា រដ្ឋា ភិបាលត្រូវតែបញ្ជូនសំណុំរឿងនោះទៅកាន់តុលាការស៊ីវិល ជាជាងអនុវត្តដោយខ្លួនឯង។ លោកស្រីក៏បានស្នើដល់រដ្ឋាភិបាលមិនត្រូវដកហូតទ្រព្យសម្បត្តិរបស់លោកស្រីដែលបានមកដោយកម្លាំងញឹសឈាមនោះឡើយ ហើយត្រូវតែបញ្ជូនទៅកាន់តុលាការជាន់ខ្ពស់កាត់ក្តីទៅតាមផ្លូវច្បាប់ ។
លោកស្រីយីងឡាក់ សរសេរនៅក្នុងបណ្តាញហ្វេសប៊ុកថា «ខ្ញុំពិតជាមានការព្រួយបារម្ភយ៉ាងខ្លាំង ដោយសារតែទីប្រឹក្សាផ្លូវច្បាប់របស់រដ្ឋាភិបាលបានប្រកាសថា ឲ្យមន្ត្រីក្នុងជួររដ្ឋាភិបាលរបស់លោកស្រីសងសំណងជារឿងមិនត្រឹមត្រូវ ហើយរឿងនេះ ចាំបាច់ត្រូវតែបញ្ជូនទៅកាន់តុលាការស៊ីវិលកាត់ក្តីទើបមានតម្លាភាព» ៕
ប្រែសម្រួល៖ ម៉ែវ សាធី
