ភ្នំពេញ ៖ នាព្រឹក ថ្ងៃទី០២ ខែតុលា ឆ្នាំ២០១៧នេះ អាជ្ញាធរខណ្ឌទួលគោក ដឹកនាំដោយ លោក ឯក ឃុនដឿន អភិបាលខណ្ឌទួលគោក និងលោកប៉ាង លីដា អភិបាលរងខណ្ឌប្រើគ្រឿងចក្រកំទេចចោលទូហ្គេម២ប្រភេទស្មើនិង២២គ្រឿង យ៉ាងម៉តក្លាយជាអេតចាយ បន្ទាប់ពីអាជ្ញាធរចុះបង្ក្រាបអស់រយះពេល២ខែកន្លងនេះ ។
លោកអភិបាលខណ្ឌទួលគោកលោកឯក ឃុនដឿនបានឲ្យដឹងថា ក្នុងរយៈពេល២ខែកន្លងមកនេះ អាជ្ញាធរខណ្ឌបាន ចុះធ្វើការអប់រំទីតាំង Internet បាន៤១កន្លែងទូរទាំងខណ្ឌក្នុងនោះក៏បានបិទ១ទីតាំង ដែលមិនអនុវត្តតាមអាជ្ញាធរចុះអប់រំមិនឲ្យមានល្បែងស៊ីសងទាំងនោះ ហើយទូហ្គេម២២គ្រឿងដែលត្រូវបានកំទេចចោលនេះ ក្នុងនោះមានទូហ្គេមបាញ់ត្រី១៧គ្រឿង និងហ្គេមប៊ៀ៥ទូ ។
លោកក៏បានបន្តថា ក្នុងនាមអាជ្ញាធរខណ្ឌទួលគោក នឹងបន្តចុះអប់រំដល់ម្ចាស់ទីតាំង Internet ជាបន្តទៀតដើម្បីអប់រំមិនឲ្យមានការប្រព្រឹត្តិល្បែងស៊ីសងជាដាច់ខាត ហើយកិច្ចការងារនេះនិងត្រូវធ្វើឡើងអោយដូចភ្លៀងរលឹម ។
គួរបញ្ជាក់ផងដែរថា អាជ្ញាធររាជធានីភ្នំពេញ ក្រោមការដឹកនាំរបស់លោកឃួង ស្រេង ជាអភិបាលតែងតែបានបើកកិច្ចប្រជុំគណៈបញ្ជាការឯកភាពរាជធានីជាប្រចាំ ដោយបានដាក់ទិសដៅនិងបទបញ្ជាអោយអាជ្ញាធរ កម្លាំងមានសមត្ថកិច្ចចំណុះអោយរដ្ឋបាលរាជធានីភ្នំពេញទាំងអស់ ពង្រឹងលើការរៀបចំសណ្តាប់ធ្នាប់ ទប់ស្កាត់បទល្មើសគ្រប់ប្រភេទ កុងស៊ីបញ្ចាំ ក្នុងនោះការបើកល្បែងស៊ីសងតាមទូហ្គេម អ៊ីនធើណែត ហ្គេមបាញ់ត្រី ក៏ត្រូវបានលើកយកមកដើម្បីអោយអាជ្ញាធរខណ្ឌនីមួយៗមានវិធានការផងដែរ។ ដោយហេតុនេះហើយទើបការអនុវត្តនៅលើកិច្ចការងារនេះត្រូវបានអាជ្ញាធរខណ្ឌធ្វើឡើងជាប្រចាំ ដើម្បីធ្វើយ៉ាងណាអោយភូមិ សង្កាត់មានសុវត្ថិភាព ស្របតាមគោលនយោបាយរបស់រាជរដ្ឋាភិបាល៕ ស តារា
