ខេត្ដឧត្ដមានជ័យ៖ ច្រកអន្ដរជាតិ ជាំសាង៉ាំជាច្រកមួយដែលមានព្រំប្រទល់ជាប់នឹងខេត្ដស៊ីសាកេតប្រទេសថៃនិង ស្រុកអន្លង់វែងខេត្ដឧត្ដរមានជ័យដែល កន្លងមកតែងតែមានក្រុមអាជីវករមកពីតាមបណ្ដាខេត្ដនានានិងប្រជាពលរដ្ឋ ដែលរស់នៅតាមខ្សែបន្ទាត់ព្រំដែន បានចេញចូលផ្លាស់ប្ដូរទំនិញគ្នាដ៏ច្រើន ដោយផ្ទុយស្រឡះនាពេលបច្ចុប្បន្ននេះ មានអាជីវករតិចតួចណាស់ដែលចេញចូលផ្លាស់ប្ដូរទំនិញ ។
បើតាមការលើកឡើងពីក្រុមអាជីវករដែលបោះបង់អាជីពម្នាក់ សុំមិន បញ្ចេញឈ្មោះនិយាយថារូបគាត់មិន អាចបន្ដអាជីពដឹកទំនិញអីវ៉ាន់ចាប់ហួយបន្ដទៅទៀតបានទេ ដោយសារតែមានការ បង់ពន្ធនៅច្រកទ្វារថ្លៃហើយមានកុងត្រូលជជុះជាច្រើនកន្លែងទៀតដែលអង្គុយ ចាំយកលុយធ្វើឱ្យការរកស៊ីរបស់គាត់ មិនចំណេញ ។
ជាក់ស្ដែងសព្វថ្ងៃនេះក្រុមអាជីវករ ដែលដឹកទំនិញមកពីប្រទេសថៃក្រោយពីមានការបង់ពន្ធជូនដល់ស្ថាប័នដែល ប្រចាំការនៅច្រកទ្វារអន្ដរជាតិគ្រប់ស្ថាប័នរួមទាំងសាខាគយ និងរដ្ឋាករផង នោះពួកគាត់ត្រូវបង់លុយទៅគយពីរ ស្ថាប័នផ្សេងទៀតដែលនៅឃ្លាតពីគ្នា ប្រហែលជា៧០០ទៅ៨០០ម៉ែតពីច្រកអន្ដរជាតិជាំក្នុងនោះមានគយចល័តខេត្ដនិងគយចល័តក្រសួងដែលបានបោះទីតាំងស្ថិតនៅក្នុងភូមិជើងភ្នុំ ឃុំត្រញំងប្រិយ ស្រុកអន្លង់វែង ។
បើតាមការលើកឡើងពីក្រុមអាជីវករជាច្រើននាក់ផ្សេងទៀតពួកគាត់បានលើកឡើងថាពួកគាត់មានការឈឺចាប់ខ្លាំង ណាស់ដែលមានកុងត្រូលជជុះកើតមាននៅស្រុកអន្លង់វែងយ៉ាងស្អេកស្កះរាប់ មិនអស់ដែលដេកចាំយកលុយមិនបានបំពេញតួនាទីរបស់ខ្លួនអីបន្ដិចសោះ ។
មន្ដ្រីគយចល័តខេត្ដនិងមន្ដ្រីគយ ចល័តក្រសួងជុំវិញប្រតិកម្មរបស់ក្រុមអាជីវករនេះអ្នកយកព័ត៌មាននគរវត្ដមិនអាចសុំការបំភ្លឺបានទេគ្រាដែលអ្នកយកព័ត៌មានសាកសួរមន្ដ្រីទាំងនេះា បែរជា ផ្គើនឱ្យថតរូបភាពពីការយកលុយទៅ ផ្សព្វផ្សាយថែមទៀត ៕
ដោយ៖ ប៉ែន នួន
