ខេត្តត្បូងឃ្មុំ៖ សមត្ថកិច្ចចម្រុះរបស់នគរបាលខេត្ត និងកងរាជអាវុធហត្ថ បានបញ្ចាក់ឲ្យដឹងថា មានករណីប្លន់រថយន្ដហ្វ័តស៊េរីឆ្នាំ២០១៣មួយគ្រឿង ពាក់ស្លាកលេខភ្នំពេញ2Y 1483 កាលពីវេលាម៉ោង៨ និង៤០នាទីយប់ នៅចំណុចក្រុមហ៊ុនចម្ការកៅពាមជាំង ស្ថិតក្នុងភូមិ៤៤ ឃុំព្រះធាតុ ស្រុកអូររាំអឪ ខេត្តត្បូងឃ្មុំ។
សមត្ថកិច្ចបានបញ្ជាក់ថា បន្ទាប់ពីទទួលបានបណ្ដឹងភ្លាមនេះ លោកម៉ៅ ពៅ ស្នងការនគរបាលខេត្ត និងលោកវ៉ា សារិទ្ធិ មេបញ្ជាការកងរាជអាវុធហត្ថខេត្ត បានសហការគ្នាដឹកនាំកម្លាំង ចេញប្រតិបត្តការជាបន្ទាន់ដែលមានការចូលរួមជាមួយនឹងកម្លាំងនគរបាលស្រុកអូររាំងឪផងនោះ ក៏បានរៀបចំផែនការចំនួន៣គោលដៅតាមប្រមាញ់ជនសង្ស័យ ដែលធ្វើសកម្មភាពប្លន់ ហើយបើកសំដៅទៅកាន់ទិសដៅខេត្តព្រៃវែង។
លោកម៉ៅ ពៅ ស្នងការនគរបាលខេត្តត្បូងឃ្មុំបានឲ្យដឹងថា បន្ទាប់ពីជនសង្ស័យចេញដំណើរឆ្ពោះទៅកាន់ខេត្តព្រៃវែង បន្តិចក្រោយមក ពួកគេបានត្រឡប់មកក្រោយវិញ ក្នុងន័យបំភាន់ដានសមត្ថកិច្ច ក្នុងទិសដៅឆ្ពោះទៅកាន់ខេត្តកំពង់ចាម ហើយកម្លាំងក៏បានដេញយ៉ាងកៀកប្រកិត។ លុះដល់ផ្លូវកែងទួលវិហារ ជនសង្ស័យមានសភាពភ័យស្លន់ស្លោ ក៏បានបើករេចង្កូត ជ្រុលទៅបុកដើមអំពិលទឹក ដែលនៅផ្នែកខាងឆ្វេងផ្លូវ ហើយព្យាយាមរត់គេចខ្លួន។
លោកស្នងការបន្តថា ភ្លាមៗនោះកម្លាំងចម្រុះរបស់យើង ក៏បានទៅដល់ ហើយព្យាយាមគ្រប់មធ្យោបាយ រកជនសង្ស័យតែដោយសារស្ថានភាពពេលនោះ យប់ងងឹតពេក និងសង្ស័យថាជនល្មើស មានប្រើប្រាស់អាវុធ ក៏ប្រើយុទ្ធសាស្ដ្របញ្ជាកម្លាំងដើម្បីព្យាយាមអង្កេតកំណត់មុខសញ្ញាក្នុងមូលដ្ឋានទីនោះ។ ប៉ុន្តែចៃដន្យស្រាប់តែ មានជនសង្ស័យចំនួន៣នាក់ បានអះអាងថា ចោរបានប្លន់រថយន្ដរបស់ខ្លួន ទើបសមត្ថកិច្ចឃាត់ខ្លួនដោយសង្ស័យថា អ្នកទាំង៣នាក់នេះ រៀបគម្រោងប្លន់ រួចហើយ ពេលសមត្ថកិច្ចមកដល់កន្លែងកើតហេតុ ក៏គេចខ្លួនបែរជាប្រើល្បិចថាពួកគេជាជនរងគ្រោះ។
លោកប្រាក់ ប៊ុនណុន ស្នងការរងទទួលផែនព្រហ្មទណ្ឌបានឲ្យដឹងថា ករណីនេះ យើងបានសាកសួរជនសង្ស័យជាបុគ្គលិកគ្រុមហ៊ុនមួយ រហូតដល់ម៉ោង៣កន្លះទាបភ្លឺ ឈានចូលថ្ងៃទី១៧ ខែតុលា ឆ្នាំ២០១៥ ហើយចម្លើយពួកគេទាំង៣ ហាក់ដូចមិនស៊ីសង្វាក់គ្នាគេ ប៉ុន្តែ យើងមានតម្រុយពិរុទ្ធភាពច្រើនចំពោះបុគ្គលិក និងអ្នកបើកបរថយន្ដថា ចោរមុនប្លន់ក៏ជិះរថយន្ដជាមួយអ្នកទាំង៣នេះដែរ ដូច្នេះនឹងត្រូវស៊ើបអង្កេតបន្ដ។
លោកម៉ៅ ពៅ ស្នងការនគរបាលខេត្ត បានបញ្ជាក់នៅព្រឹកថ្ងៃទី១៧ ខែតុលា ឆ្នាំ២០១៥ថា កម្លាំងរបស់យើកកំពុងធ្វើការក្នុងរឿងនេះយ៉ាងសកម្ម ហើយសង្ស័យថា ជាករណីបំភ្លៃ ខណៈមានតម្រុយពិរុទ្ធភាពជាច្រើន អាចពាក់ព័ន្ធក្នុងបទល្មើសប្លន់នេះ។
បើទោះជាមានការលើកឡើងបែបនេះក៏ដោយពីសមត្ថកិច្ច ចំណែកបុគ្គលិកទាំង៣នាក់របស់ក្រុមហ៊ុនមួយនេះ បានប្រាប់សមត្ថកិច្ចថា ពួកគេមានគ្នា៣នាក់បានបើករថយន្ដមួយគ្រឿង ដើម្បីធ្វើការងារនៅតាមដងផ្លូវ។ លុះពេលឈប់រថយន្ដ ក៏លេចមុខជនសង្ស័យម្នាក់មានកាំភ្លើងខ្លី មួយដើមមកភ្ជង់ ខណៈបក្ខពួករបស់ពួកគេមួយក្រុមទៀតបើករថយន្ដមួយគ្រឿងបិទគូទ ហើយប្លន់យករថយន្ដបើកគេចខ្លួន។ ពួកគេបន្ដថា បើករថយន្ដចេញបានចម្ងាយប្រមាណជាង២០គីឡូម៉ែត្រ ពោកគឺមកដល់ចំណុចស្រែសៀម ក្បែរព្រំប្រទល់ស្រុកអូររាំងឪ និងស្រុកត្បូងឃ្មុំក៏បុកដើមឈើ ឈប់នៅទីនោះតែម្ដង។
បទល្មើសនេះមានលក្ខណៈស្មុគស្មាញ ដូច្នេះលោកប្រាក់ ប៊ុនណុន ទទួលផែនព្រហ្មទណ្ឌខេត្តត្បូងឃ្មុំ បានអះអាងថា យើងនឹងធ្វើការស៊ើបអង្កេតបន្ដតាមនីតិវិធី ដើម្បីរកឲ្យឃើញពីជនប្រព្រឹត្តក្នុងអំពើប្លន់យករថយន្ដរបស់ក្រុមហ៊ុនក្នុងស្រុកមួយនេះ៕
ដោយ៖ វណ្ណៈ
