ខេត្តសៀមរាប ៖ នៅថ្ងៃទី១៣ ខែវិច្ឆិកា ឆ្នាំ២០១៧ វេលាម៉ោង១និង៣៥នាទីរសៀលកម្លាំង នគរបាលប្រឆាំង បទល្មើសសេដ្ឋកិច្ចនៃស្នងការដ្ឋាននគរបាលខេត្តបានសហការជាមួយមន្ត្រី នៃមន្ទីរសុខាភិបាលខេត្តសៀម រាប និង កម្លាំងអធិការដ្ឋាននគរបាលក្រុងសៀមរាប បានចុះបង្ក្រាប ទីតាំងលក់ឱសថ និងអាហាបំប៉នសុខភាពគ្មានច្បាប់អនុញ្ញាតពីក្រសួងសុខាភិបាលមួយកន្លែង នៅក្នុងភូមិបន្ទាយចាស់ សង្កាត់ស្លក្រាម ក្រុងខេត្តសៀមរាប។ជាលទ្ធផលសមត្ថកិច្ចបានធ្វើការ ពិនិត្យនិងដកហូតយកវត្ថុតាងមួយចំនួនមានដូចជា ៖ ឱសថបំប៉នសុខភាព៣មុខ មានចំនួន ៩៨កំប៉ុង ស្មើនឹង២៩៤០គ្រាប់ និង គ្រឿងសម្អាងចំនួន ៧មុខមានចំនួន៧៦ប្រអប់ ដែលជាវត្ថុតាងទាំងនេះ គ្មានគុណភាព ។
សមត្ថកិច្ចចម្រុះបានឲ្យដឹងថា ក្នុងកិច្ចប្រតិបត្តិការនេះសមត្ថកិច្ចបានធ្វើកំណត់ហេតុដកហូត វត្ថុតាងខាងលើ និងបិទទីតាំងនេះជាបណ្ដោះអាសន្នព្រមទាំងនាំខ្លួនម្ចាស់ឈ្មោះបឿនវិចិត្រ ភេទប្រុសអាយុ២៩ឆ្នាំជាអ្នកមើលការខុសត្រូវក្នុងក្រុមហ៊ុន រួមទាំងឈ្មោះអោន រៀម ភេទប្រុសអាយុ២៥ឆ្នាំជាអ្នកពន្យល់ណែនាំអំពីផលិតផលរបស់ក្រុមហ៊ុនមកធ្វើការសាកសួរនៅស្នងការដ្ឋាននគរបាលខេត្តសៀមរាប ។
ចំពោះវត្ថុតាងគ្មានគុណភាពត្រូវបានប្រគល់ទៅឲ្យមន្ត្រីនៃមន្ទីរសុខាភិបាលខេត្តដើម្បីរៀបចំ ដុតកម្ទេចចោល៕ ប៊ុន រិទ្ធី
