ភ្នំពេញ ៖ មួយរយះនេះគេឃើញក្រុមចោរឆក់ តែងតែធ្វើសកម្មភាពជាក្រុមមិនតិចក្រោមពី៤ទៅ៥នាក់នោះទេ ហើយការធ្វើសកម្មភាពនោះ ជាក់ស្តែងកាលពីវេលាម៉ោង១១និង៤០នាទីយប់ថ្ងៃទី២២ ខែវិច្ឆិកា ឆ្នាំ២០១៧ នារីម្នាក់បានបើកម៉ូតូមួយគ្រឿងដឹកប្អូនប្រុស ពេលកំពុងធ្វើដំណើរតាមបណ្តោយផ្លូវលេខ២៥៧កែងផ្លូវកម្ពុជាក្រោម ក្បែរវិទ្យាស្ថានអាស៊ីអឺរ៉ុប សង្កាត់ទឹកល្អក់ទី២ ខណ្ឌទួលគោក ស្រាប់តែជនសង្ស័យមួយក្រុមមានគ្នា៨នាក់ជិះម៉ូតូ៤គ្រឿងធ្វើសកម្មភាពឆក់កាបូបស្ពាយពីនារីគ្រោះបានសម្រេច ហើយគេចខ្លួនដោយសុវត្ថិភាព ។
តាមប្រភពព័ត៍មានពីកន្លែងកើតហេតុ បានឲ្យដឹងថា នារីរងគ្រោះឈ្មោះ រៀល សនវិជ្ជនា ភេទស្រី អាយុ២២ឆ្នាំ ជាបុគ្គលិកក្រុមហ៊ុន និងប្អូនប្រុសឈ្មោះ រៀល សាវតា ភេទប្រុស អាយុ១៩ឆ្នាំ មុខរបរនិស្សិតឆ្នាំទី១ អ្នកទាំង២នាក់ស្នាក់នៅផ្ទះលខ១៤៣ ផ្លូវលេខ១៦៣ សង្កាត់ទឹកល្អក់ទី២ ខណ្ឌទួលគោក ។
ប្រភពដដែរ បានបន្តទៀតថា មុនពេលកើតហេតុ គេឃើញជនរងគ្រោះ២នាក់បងប្អូន បានជិះម៉ូតូមួយគ្រឿង ពណ៌ខ្មៅ ពាក់ស្លាកលេខភ្នំពេញ 1FD-8956 ដោយធ្វើដំណើរតាមផ្លូវ២៥៧ ក្នុងទិសដៅពីជើងទៅត្បូង លុះដល់ចំណុចកើតហេតុខាងលើកែងផ្លូវកម្ពុជាក្រោម ស្រាប់តែលេចមុខជនសង្ស័យមួយក្រុមមានគ្នា៨នាក់ ជិះម៉ូតូ៤គ្រឿងមិនចាំម៉ាកទេបានជិះមកពីក្រោយ ហើយធ្វើសកម្មភាពឆក់កាបូបស្ពាយពីនារីរងគ្រោះ រៀល សនវិជ្ជនា បានសម្រេចហើយក្រុមជនសង្ស័យបានជិះរត់គេចខ្លួនបាត់ស្រមោលនិងបង្កការភ្ញាក់ផ្អើលតែម្តង ។
ក្រោយពេលជនរងគ្រោះ២នាក់បងប្អូន បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកល្អក់ទី២ ដើម្បីឲ្យសមត្ថកិច្ចធ្វើការស្រាវជ្រាវស្វែងរកចាប់ខ្លួនក្រុមជនសង្ស័យទាំងនោះយកមកដាក់ទោសទៅតាមច្បាប់ ។ ចំណែកឯសម្ភារះដែលបាត់បង់ នៅក្នុងកាបូបស្ពាយនោះមានលុយចំនួន២៥០០ដុល្លារ ទូរស័ព្ទIPHONE 6 មួយគ្រឿង កុំទ្យូទ័រDELL១គ្រឿង និងឯកសារមួយចំនួនផងដែរ ៕ ស តារា
...
