ខេត្តកណ្តាល ៖ នគរបាលស្រុកខ្សាច់កណ្តាលបានឃាត់ខ្លួនជនសង្ស័យម្នាក់ រួមនឹងថ្នាំញៀនចំនួន ២១កញ្ចប់តូច និងសម្ភារមួយចំនួនទៀត កាលពីថ្ងៃសៅរ៍ ១៣រោច ខែមិគសិរ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៦ ខែធ្នូ ឆ្នាំ២០១៧ វេលាម៉ោង១២ ត្រង់ចំណុចក្នុងវត្តព្រះវិហារសួគ៌ ភូមិវិហារសួគ៌ជើង ឃុំវិហារសួគ៏ ស្រុកខ្សាច់កណ្តាល ខេត្តកណ្តាល ។
នគរបាលស្រុកខ្សាច់កណ្តាលបានឲ្យដឹងថា ជនសង្ស័យឈ្មោះ វេ វីរះ ភេទប្រុស អាយុ ១៧ឆ្នាំ មានទីលំនៅភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ត្រូវចាប់ខ្លួនពីបទជួញដូរថ្នាំញៀន ។
ក្នុងការឃាត់ខ្លួន សមត្ថកិច្ចចាប់យកវត្ថុតាងថ្នាំញៀនចំនួន២១កញ្ចប់តូច , ទូរស័ព្ទម៉ាក សាមសុង ស៊េរីgalaxy S2 ពណ៌ស ចំនួន១គ្រឿង , ម៉ូតូម៉ាកគុបជ្រុងសេ70 ពណ៌ទឹកប៊ិច ចំនួន០១គ្រឿង ។
គួររំឭកថា កន្លងមកឈ្មោះ វេ វីរះនេះ ធ្លាប់ជាមុខសញ្ញាជួញដូរថ្នាំញៀនយ៉ាងសកម្មផងដែរ នៅក្នុងមូលដ្ឋានខាងលើ ។
បច្ចុប្បន្ន ជនសង្ស័យ និងវត្ថុតាងខាងលើ ត្រូវបានបញ្ជូនមកអធិការដ្ឋាននគរបាលស្រុក បន្តអនុវត្តតាមនីតិវិធី ៕ ស្អាងជ័យ
