ខេត្តត្បូងឃ្មុំ ៖ យ៉ាងហោចណាស់ មានមនុស្សម្នាក់បានស្លាប់ និង៥នាក់ទៀតរងរបួសធ្ងន់ ក្នុងករណីគ្រោះថ្នាក់ចរាចរណ៍រវាងរថយន្តបុកគ្នាជាមួយរថយន្ត កាលពីវេលាម៉ោង៩ និង៣០នាទី ថ្ងៃព្រហស្បតិ៍ ២កើត ខែមាឃ ឆ្នាំរកា នព្វស័ក ពុទ្ធសករាជ ២៥៦១ ត្រូវនឹងថ្ងៃទី១៨ ខែមករា ឆ្នាំ២០១៨ លើផ្លូវជាតិលេខ៧ ចន្លោះបង្គោលគីឡូម៉ែត្រ ១៣០- ១៣១ ឋិតក្នុងភូមិទួលវិហារ ឃុំជីរោទិ៍២ ស្រុកត្បូងឃ្មុំ ខេត្តត្បូងឃ្មុំ ។
នគរបាលចរាចរណ៍បានប្រាប់អោយដឹងថា រវាងយន្តទាំង ពីរមួយគ្រឿងម៉ាកតូយូតាហ៊ីលុច្ស ពណ៌ទឹកមាស ពាក់ស្លាក លេខភ្នំពេញ 2W-5697 បើកបរដោយឈ្មោះយី វឌ្ឍនះ ភេទប្រុស អាយុ៣៦ឆ្នាំ ជាតិខ្មែរ នៅភូមិស្រែសៀម ឃុំជីរោទិ៍២ ស្រុកត្បូងឃ្មុំ ខេត្តត្បូងឃ្មុំ (របួសធ្ងន់) រួមដំណើរដោយមនុស្សពីរនាក់ ១-ឈ្មោះគា គីមសែ ភេទប្រុស អាយុ៤៦ ឆ្នាំ ជាតិខ្មែរ នៅខេត្តកំពង់ចាម(របួសធ្ងន់) ២-ឈ្មោះ រ័ត្ន ភេទប្រុសអាយុ៤៥ឆ្នាំ ជាតិខ្មែរ រស់នៅភូមិទួលសំបូរ ឃុំជប់ ស្រុកត្បូងឃ្មុំ ខេត្តត្បូងឃ្មុំ (ស្លាប់នៅហ្នឹងកន្លែងកើតហេតុ)។
សមត្ថកិច្ចបន្តថា រថយន្តមួយគ្រឿងទៀតម៉ាកសាំងយ៉ុង ពណ៌បៃតងចាស់ ផ្លាកលេខភ្នំពេញ 2O-7287 បើកបរដោយឈ្មោះ យ៉ា ភេទប្រុស អាយុ២៨ឆ្នាំ ជនជាតិខ្មែរ រស់នៅភូមិបឹងកុក២ សង្កាត់បឹងកុក ក្រុងកំពង់ចាម ខេត្តកំពង់ចាម ( របួសធ្ងន់) ដឹកមនុស្សពីរនាក់ ១-ឈ្មោះណាន់ ភេទប្រុស អាយុ២៥ឆ្នាំ ជនជាតិខ្មែរ រស់នៅភូមិជ្រោយថ្ម សង្កាត់បឹងកុក ក្រុងកំពង់ចាម ខេត្តកំពង់ចាម (របួសធ្ងន់) ២-ឈ្មោះ វណ្ណា ភេទប្រុស អាយុ២០ឆ្នាំ រស់នៅភូមិជ្រោយថ្ម សង្កាត់បឹងកុក ក្រុងកំពង់ចាម ខេត្តកំពង់ចាម (របួសធ្ងន់)។
រថយន្តទាំងពីរគ្រឿងនេះ បើកក្នុងទិសដៅបញ្រ្ចាសគ្នា ដោយរថយន្តតូយូតាហ៊ីលុច្ស ពីលិចទៅកើត ចំណែតរថយន្តសាំងយ៉ុងពីកើតទៅលិច ។
ក្រោយកើតហេតុ នគរបាលជំនាញផ្នែកចរាចរណ៍បានចុះមកវាស់វែងតាមនីតិវិធី និងបានយកមធ្យោបាយធ្វើ ដំណើរទាំង២គ្រឿងមករក្សាទុក ។ ចំណែកមូលហេតុដែលផ្តើមឲ្យមានគ្រោះថ្នាក់គឺដោយសារភាគីរថយន្ត សាំយុងបើកជែង ក្នុងស្ថានភាពមិនអំណោយផល ទាំងខ្លួនមានជាតិស្រវឹង ទើបបង្កឲ្យកើតមានគ្រោះថ្នាក់យ៉ាង ដូច្នេះ ៕ វណ្ណៈ
