ភ្នំពេញ​ ៖ ​ក្មេងស្រីដើររើសអេតចាយ អាយុ៧ឆ្នាំម្នាក់ បានស្លាប់នៅនឹងកន្លែងកើតហេតុ និងម្នាក់ទៀតបានរងរបួស ស្រាល ​ខណៈកំពុងដើររើសអេតចាយនៅតាមចិញ្ចើមផ្លូវត្រូវគ្រឿងបើកវ៉ាជែងរថយន្តមួយគ្រឿងជ្រុលមកបុកពេញទំហឹង។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង​ ១និង១០នាទីរសៀលថ្ងៃទី២​ ខែមីនាឆ្នាំ២០១៨ ​ស្ថិតនៅតាមបណ្តោយផ្លូវជាតិលេខ៥ មុខឃ្លាំងសាំងសូគីម៉ិច ក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។

រថយន្តបង្កម៉ាក​ALPHARD ពណ៌សរពាក់ស្លាកលេខ​ ភ្នំពេញ​ 2AV-7998 អ្នកបើករដោយឈ្មោះង៉ាន់ វណ្ណឌីភេទប្រុសអាយុ២៧ឆ្នាំ មានទីលំនៅឃុំចំការអណ្តូង ស្រុកចំការលើ  ខេត្តកំពង់ចាម ។  រីឯក្មេងរងគ្រោះដែលស្លាប់-ឈ្មោះ​ សេនទីណូតភេទស្រី​ អាយុ​៧ឆ្នាំ​ ស្នាក់នៅក្រោមដំបូលតង់នៅក្បែរកន្លែងកើតហេតុ។ ចំណែកក្មេងរងរបួសស្រាលមានឈ្មោះសេនស្រីពេជ្រភេទស្រីអាយុ១០ឆ្នាំ ។

តាមប្រភពព័ត៌មានពីកន្លែងកើតហេតុបានឲ្យដឹងថា ​មុនពេលកើតហេតុគេឃើញរថយន្ត​បង្កបើកបរតាមផ្លូវជាតិលេខ ៥ ក្នុងទិសដៅពីជើងទៅត្បូង ខណៈមកដល់ចំណុចកើតហេតុ បានបើកវ៉ាខាងស្តាំដៃរថយន្តមួយគ្រឿង​ទៀតដែលកំពុងបើកបរស្របទិសដៅគ្នាហើយក៏ជ្រុលចង្កូតទៅបុកក្មេងស្រីរងគ្រោះកំពុងដើររើសអេតចាយនៅចិញ្ចើមផ្លូវបណ្តាលឲ្យស្លាប់ម្នាក់ភ្លាមៗ  នៅនឹងកន្លែងកើតហេតុនិងម្នាក់ទៀតរងរបួសស្រាលតែម្តង។

ក្រោយកើតហេតុអ្នកបើកបររថយន្តបង្កព្យាយាមបើករត់បានប្រមាណ៤០០ម៉ែត្រមកដល់ចំណុចមុខប៉ុស្តិ៍នគរបានរដ្ឋ​បាលព្រែកព្នៅក៏ត្រូវបានសមត្ថកិច្ចឃាត់បានទាំងរថយន្តនឹងអ្នកបើកបរ ។

ក្រោយកើតហេតុ​សមត្ថកិច្ចមូលដ្ឋានបានចុះទៅដល់កន្លែងកើតហេតុបានទាក់ទងទៅសមត្ថកិច្ចជំនាញឲ្យចុះមកកន្លែងកើតហេតុធ្វើការវាស់វែង​និង ប្រគល់ខ្លួនអ្នកបើកបរ​ រថយន្តបង្ក​ ទៅរក្សាទុកនៅការិយាល័យនគរបាលចរាចរណ៍ផ្លូវគោក​នៃស្នងការដ្ឋាននគរបាលរាជធានីភ្នំពេញ​ ដើម្បីចាត់ការតាមច្បាប់ ។ សពក្មេងរងគ្រោះ សមត្ថកិច្ចបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី​៕ ធឿនព្រែកជ័យ