ភ្នំពេញ៖ នៅថ្ងៃទី ១៩ ខែមីនា ក្រុមការងារយុទ្ធនាការសុវត្ថិភាពចរាចរណ៍ផ្លូវគោករបស់ ក្រុមហ៊ុនព្រូដិនសលកម្ពុជា និងតារាសម្តែងអន្តរជាតិដ៍ល្បីលោកស្រី Michelle Yeoh ចូលរួមកម្មវិធីវិធានការស្តីពីសុវត្ថិភាពចរាចរណ៍ផ្លូវគោក ក្នុងការលើកកម្ពស់សុវត្ថិភាពក្នុងការប្រើប្រាស់ផ្លូវក្នុងខេត្តសៀមរាប និងនៅទូទាំងប្រទេសកម្ពុជា។
អ្នកដែលចូលរួមក្នុងកម្មវិធីមាន បុគ្គលិកក្រុមហ៊ុនព្រូដិនសលកម្ពុជា គ្រូបង្រៀន សិស្ស និងប៉ូលិសចរាចរណ៍នឹងចូលរួមជាមួយលោកស្រី Yeoh នៅសាលាបឋមសិក្សាគ្រួស និងផ្លូវប្រសព្វនានា ក្នុងខេត្តសៀមរាប ដែលគាត់នឹងជួយអប់រំអ្នកធ្វើដំណើរ អំពីការប្រើផ្លូវថ្នល់តាមផ្លូវប្រកបដោយសុវត្ថិភាព និងសារៈសំខាន់នៃការពាក់មួកសុវត្ថិភាពពេលប្រើប្រាស់ដងផ្លូវ។
លោកស្រី Michelle Yeoh គឺជាទូតសុឆន្ទៈរបស់អង្គការ UNDP ជាអ្នកនាំពាក្យនៃគណៈកម្មការជាន់ខ្ពស់ដើម្បីសុវត្ថិភាពចរាចរណ៍ផ្លូវគោករបស់សហព័ន្ធយានយន្តអន្តរជាតិ(FIA) និងក៏ជាទូតសុឆន្ទៈសុវត្ថិភាពចរាចរណ៍ផ្លូវគោកសកល សម្រាប់ទសវត្សរ៍ដើម្បីសុវត្ថិភាពចរាចរណ៍ផ្លូវគោក 2011-2020 របស់អង្គការសហប្រជាជាតិ។ លោកស្រីទទួលយកតួនាទីជាទូតសុឆន្ទៈសុវត្ថិភាពចរាចរណ៍ផ្លូវគោក SAFE STEPS មួយទៀត ដើម្បីគាំទ្រដល់យុទ្ធនាការនេះដោយមិនយកប្រាក់កម្រៃ។
លោកស្រី Michelle Yeoh មានឈ្មោះល្បីល្បាញដោយសារការសម្តែងរបស់លោកស្រីនៅក្នុងខ្សែភាពយន្តដ៏ល្បីៗមួយចំនួនដូចជា ខ្សែភាពយន្ត “Crouching Tiger, Hidden Dragon” និង ខ្សែភាពយន្ត James Bond រឿង “Tomorrow Never Dies”។ កាលពីពេលថ្មីៗនេះ លោកស្រីបានទទួលការចាប់អារម្មណ៍លើឆាកអន្តរជាតិចំពោះការសម្តែងរបស់លោកស្រីនៅក្នុងកម្មវិធីទូរទស្សន៍ Star Trek ដែលមានឈ្មោះថា “Star Trek: Discovery”។
ក្រុមហ៊ុន ព្រូដិនសលកម្ពុជា បាននិងកំពុងបន្តបង្ហាញការប្តេជ្ញាចិត្តដ៏វែងឆ្ងាយរបស់ខ្លួន ក្នុងការបម្រើប្រជាពលរដ្ឋខ្មែរគ្រប់គ្នា ដោយគាំទ្រសហគមន៍មូលដ្ឋាននានាតាមរយៈការបង្កើតគំនិតផ្តួចផ្តើមដ៏មានឥទ្ធិពលនិងមានអត្ថន័យធំធេង ដូចជាគម្រោងអប់រំវិធានការសុវត្ថិភាពនានា (SAFE STEPS) ដែលបុគ្គលិករបស់ក្រុមហ៊ុន ព្រូដិនសលកម្ពុជា បានស្ម័គ្រចិត្តចំណាយពេលវេលាជាមួយអាជ្ញាធរមូលដ្ឋាននិងសិស្សានុសិស្ស និងអ្នកពាក់ព័ន្ធនានាដើម្បីអប់រំប្រជាពលរដ្ឋនៅតាមបណ្តារខេត្តនានានៅកម្ពុជា។
ក្នុងរយៈពេល៥ឆ្នាំដែលក្រុមហ៊ុន ព្រូដិនសលកម្ពុជា បានចាប់ផ្តើមផ្តល់សេវាធានារ៉ាប់រងអាយុជីវិតរបស់ខ្លួននៅក្នុងប្រទេសកម្ពុជាមក ក្រុមហ៊ុនបានបង្ហាញការប្តេជ្ញាចិត្តរបស់ខ្លួនយ៉ាងឋិតថេរ ក្នុងការផ្តល់មិនត្រឹមតែសេវាហិរញ្ញវត្ថុដ៏ល្អបំផុតនិងការការពារដល់ប្រជាពលរដ្ឋខ្មែរប៉ុណ្ណោះទេ តែថែមទាំងលើកកម្ពស់និងផ្តល់ជំនួយដល់សហគមន៍នានាទូទាំងប្រទេសកម្ពុជាផងដែរ៕
ដោយ វឌ្ឍនា
