ភ្នំពេញ៖នៅព្រឹកថ្ងៃទី០៩ ខែឧសភា ឆ្នាំ២០១៨ នេះ តុលាការកំពូល នឹងបើកសវនាការរឿងក្តីទណ្ឌិតសម រង្ស៊ី ពាក់ព័ន្ធបទល្មើសសមគំនិតក្លែងសន្ធិសញ្ញាព្រំដែនកម្ពុជាវៀតណាម ។
ឯកសារតុលាការកំពូល ទទួលបាន បង្ហាញថា សវនាការនេះដឹកនាំដោយលោក គង់ ស្រ៊ីម ជាប្រធានក្រុមប្រឹក្សាជំនុំជម្រះ និង លោក ជុំ សំបាន ជាតំណាងមហាអយ្យការ ។
ទណ្ឌិតសម រង្ស៊ី ជាប់ចោទពីបទ”សមគំនិតក្នុងអំពើបន្លំឯកសារសាធារណៈ ប្រើប្រាស់ឯកសារសាធារណៈក្លែងក្លាយ និង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅរាជធានីភ្នំពេញ កាលពីថ្ងៃទី១២ និង ១៣ ខែសីហា ឆ្នាំ២០១៥ ។
គួរបញ្ជាក់ថា ទាំងសាលាដំបូងរាជធានីភ្នំពេញ និង សាលាឧទ្ធរណ៍ គឺ បានសម្រេចដូចគ្នាផ្តន្ទាទោសទណ្ឌិតសម រង្ស៊ី ដាក់ពន្ធនាគាររយៈពេល៥ឆ្នាំ ។ ប៉ុន្ដែការសម្រេចនេះ ត្រូវបានមេធាវីការពារសិទ្ធិទណ្ឌិត សម រង្ស៊ី ប្តឹងសាទុក្ខមកតុលាការកំពូល ។
ទណ្ឌិតសម រង្ស៊ី បច្ចុប្បន្នមានរឿងក្តីក្តាំជាច្រើន ក្នុងកណ្តាប់ដៃតុលាការ ដោយរឿងក្តីខ្លះបានចូលជាស្ថាពរនិងរឿងក្តីខ្លះកំពុងដំណើរការនីតិវិធី ៕ចេស្តា
