ខេត្តពោធិ៍សាត់៖ យុវជនម្នាក់ធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីលិចទៅកើតបានបុករថយន្ដហ៊ីយ៉ាន់ដាយដឹកខ្សាច់បត់ទទឹងផ្លូវ បណ្ដាលឱ្យរងរបួសយ៉ាងធ្ងន់ធ្ងរ ។

ហេតុការណ៍គ្រោះថ្នាក់ចរាចរណ៍បានកើតឡើងកាលពីវេលាម៉ោង ៧ និង០៥នាទីព្រឹក ថ្ងៃទី១២ ខែវិច្ឆិកា ឆ្នាំ២០១៥ ត្រង់ចំណុចខាងកើតផ្លូវបំបែកទៅស្រុកភ្នំក្រវាញ ប្រមាណ ១០០ម៉ែត្រ ស្ថិតក្នុងភូមិថ្នល់បំបែក សង្កាត់រលាប ក្រុង-ខេត្ដពោធិ៍សាត់ ។

ជនរងគ្រោះម្ចាស់ម៉ូតូរងរបួសត្រូវបានគេស្គាល់ឈ្មោះ បូ ពេជ្រ ភេទប្រុស អាយុ២១ឆ្នាំ រស់នៅភូមិកំប៉ាង ឃុំស្វាយដូនកែវ ស្រុកបាកាន ខេត្តពោធិ៍សាត់ ។

ប្រភពនានាជុំវិញកន្លែងកើតហេតុ គេឃើញជនរងគ្រោះធ្វើដំណើរដោយម៉ូតូមួយគ្រឿងតាមបណ្ដោយផ្លូវជាតិលេខ ៥ ពីលិចទៅកើត លុះមកដល់ចំណុចកើតហេតុក៏បានបុករថយន្ដម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ពោធិ៍សាត់ 3A-0364 ដឹកខ្សាច់បត់ទទឹងថ្នល់ជាតិ បណ្ដាលឱ្យម៉ូតូនៅពីក្រោមរថយន្ដរងរបួសយ៉ាងធ្ងន់ធ្ងរ ចំណែកអ្នកបើកបររថយន្ដឃើញហេតុការណ៍ដូច្នេះក៏បើកទ្វាររថយន្តរត់គេចខ្លួនបាត់ស្រមោល ។

វត្ថុតាងម៉ូតូនិងរថយន្ត ត្រូវបាននគរបាលចរាចរណ៍ក្រុងពោធិ៍សាត់ យកទៅរក្សាទុករងចាំដោះស្រាយគ្នាជាក្រោយ ចំណែកអ្នករងរបួសត្រូវបាននគរបាលចរាចរណ៍ខេត្តយករថយន្ដសង្គ្រោះដឹកទៅព្យាបាលនៅមន្ទីរពេទ្យបង្អែកខេត្តពោធិ៍សាត់ ។

ដោយ៖ ប៉ឹម ពិន