ខេត្តកណ្តាល៖ មុខសញ្ញារក្សាទុកសារធាតុញៀនខុសច្បាប់ ម្នាក់ត្រូវបានសមត្ថកិច្ចនគរបាលប៉ុស្តិ៍រដ្ឋបាលតាក្តុលចេញល្បាតចាប់ខ្លួនបាន កាលពីវេលាម៉ោង២២ និង២០នាទី ថ្ងៃទី១១ ខែវិច្ឆិកា ឆ្នាំ២០១៥នៅលើកំណាត់ផ្លូវជាតិលេខ២ ស្ថិតក្នុងភូមិតាក្តុលត្បូង សង្កាត់តាក្តុល ក្រុងតាខ្មៅ ។
មន្ត្រីនគរបាលប៉ុស្តិ៍រដ្ឋបាលតាក្តុលបានឲ្យដឹងថា ជនសង្ស័យមានឈ្មោះ ម៉ៅ ស៊ីណា ភេទប្រុស អាយុ២៦ឆ្នាំ មុខរបរ ជាជាងផ្សាដែក មានទីលំនៅក្នុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។ ក្នុងប្រតិបត្តិការឃាត់ខ្លួនជនសង្ស័យខាងលើនេះ សមត្ថកិច្ចនគរបាលបានរឹបអូសថ្នាំញៀនមេតំហ្វេតាមីន ហៅម៉ាទឹកកក០១កញ្ចប់ និងទូរស័ព្ទដៃ០១គ្រឿងផងដែរ ។
ប្រភពដដែលបានបន្តថា នៅយប់ថ្ងៃទី១១ ខែវិច្ឆិកា ឆ្នាំ២០១៥ សមត្ថកិច្ចនគរបាលប៉ុស្តិ៍រដ្ឋបាលតាក្តុលបានចេញល្បាតនៅក្នុងភូមិសាស្ត្ររបស់ខ្លួន រហូតបានប្រទះឃើញមុខសញ្ញាខាងលើនេះកំពុងដើរតាមបណ្តោយផ្លូវជាតិលេខ២ ។ ឃើញដូច្នេះកម្លាំងល្បាតបានហៅឲ្យឈប់សុំធ្វើការឆែកឆរ រហូតរកឃើញមានវត្ថុតាងជាក់ស្តែងឃាត់ខ្លួនវាយខ្នោះ បញ្ជូនទៅកាន់អធិការនគរបាលក្រុងតាខ្មៅ ដើម្បីចាត់ការតាមច្បាប់ ៕
ដោយ៖ ស្អាងជ័យ
