ខេត្តកំពង់ឆ្នាំង៖ សិស្សសាលាស្រីម្នាក់បានស្លាប់ភ្លាមៗនៅនឹងកន្លែងកើតហេតុ នៅក្នុងឧប្បត្តិហេតុគ្រោះថ្នាក់ចរាចរណ៍មួយដែលបង្កឡើងដោយរថយន្តសាំយ៉ុងបុកម៉ូតូសិស្សសាលាពីក្រោយពេញមួយទំហឹង ។
ហេតុការណ៍នេះបានឡើងកាលពីវេលាម៉ោង២និង៤៥នាទីរសៀលថ្ងៃទី១២ ខែវិច្ឆិកា ឆ្នាំ២០១៥ នៅលើផ្លូវជាតិលេខ៥ ស្ថិតក្នុងភូមិទ័ពត្បែង ឃុំពង្រ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចនគរបាលចរាចរណ៍ផ្លូវគោកស្រុករលាប្អៀរ បានអោយដឹងថា ជនរងគ្រោះមានឈ្មោះ ឡេវ រចនា ភេទស្រី អាយុ១៦ឆ្នាំ ជាសិស្សវិទ្យាល័យ ហ៊ុន សែន រលាប្អៀរជើង មានទីលំនៅក្នុងភូមិត្រពាំងធំ ឃុំពង្រ ស្រុករលាប្អៀរ ។
សមត្ថកិច្ចអោយដឹងថា នៅមុនពេលកើតហេតុជនរងគ្រោះបានជិះម៉ូតូហុងដា សេ១២៥ ពាក់ស្លាកលេខ កំពង់ឆ្នាំង 1B-0069 ចេញមកពីវិទ្យាល័យហ៊ុនសែនរលាប្អៀរជើង នៅពេលជិះដល់ចំណុចកើតហេតុក៍មានរថយន្តតាក់ស៊ីម៉ាកសាំយ៉ុងមួយគ្រឿង ពណ៌ស្លែ ពាក់ផ្លាកលេខ ភ្នំពេញ2L-8760 បើកក្នុងល្បឿនលឿន ក្នុងទិសដៅស្របគ្នាពីជើងទៅត្បួង ក៏បានជ្រុលទៅបុកម៉ូតូសិស្សសាលាចំពីក្រោយពេញមួយទំហឹង បណ្តាលអោយម៉ូតូនិងរូបនាងប៉ើងធ្លាក់ចិញ្ចើមផ្លូវ សិស្សសាលាបោកនិងផ្លូវស្លាប់ភ្លាមៗនៅនឹងកន្លែងកើតហេតុ ។ ចំណែកឯអ្នកបើកបររថយន្តសាំយ៉ុងក្រោយបង្កគ្រោះថ្នាក់ បានចុះរត់គេចខ្លួនបាត់តែម្តង ។
ក្រោយពេលកើតហេតុសមត្ថកិច្ចបានយកមធ្យោបាយទាំងពីរយកមករក្សាទុកនៅការិយាល័យចរាចរណ៍ផ្លូវគោកខេត្តកំពង់ឆ្នាំង ដើម្បីចាត់ការបន្តតាមនីតិវិធី ៕
ដោយ៖ ចន្ថា
