កណ្ដាលៈ ជនសង្ស័យជាមុខសញ្ញាជួញដូរគ្រឿងញៀន២នាក់ត្រូវបាននគរបាលផ្នែកប្រឆាំងគ្រឿងញៀនស្រុក សហការជាមួយកម្លាំងនគរបាលប៉ុស្ដិ៍រដ្ឋបាលក្រាំងម្កាក់ ចុះធ្វើការបង្រ្កាចាប់ខ្លួននិងរឹបអូសថ្នាំញៀនចំនួន៥កញ្ចប់ ដើម្បីកសាងសំណុំរឿងចាត់ការតាមនីតិវិធីច្បាប់ ។ ប្រតិបត្ដិការបង្រ្កាបខ្លួនខាងលើនេះ ធ្វើឡើងកាលពីវេលាម៉ោង១១និង៥០នាទី ថ្ងៃទី៧ ខែមិថុនា ឆ្នាំ២០១៨ ស្ថិតក្នុងភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល ។

        មន្រ្ដីនគរបាលស្រុកអង្គស្នួលបានឲ្យដឹងថា ជនសង្ស័យចាប់ខ្លួនបានមាន២នាក់ ទី១-ឈ្មោះ សរ  ចិត្រា ហៅប៉ៅ ភេទប្រុស អាយុ២៣ឆ្នាំ ជនជាតិខ្មែរ  មុខរបរជាងកាត់សក់ មានទីលំនៅភូមិខ្ចៅ សង្កាត់បឹងធំ ខណ្ឌពោធិ៏សែនជយ័ រាជធានីភ្នំពេញ និងទី២-ឈ្មោះ យ៉ែម ចាន់ណា ហៅស្គូ ភេទប្រុស អាយុ៣១ឆ្នាំ ជនជាតិខ្មែរ មុខរបរករ កម្មករសំណង់ មានទីលំនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល ។
ក្នុងប្រតិបត្ដិការបង្រ្កាបចាប់ខ្លួននេះផងដែរ នគរបាលបានធ្វើការដកហូតវត្ថុតាងមាន៖
ថ្នាំញៀនប្រភេទមេតំហ្វេតាមីនហៅម៉ាទឹកកកចំនួន២កញ្ចប់មធ្យម ,ទូរស័ព្ទដៃ១គ្រឿង និងឧបករណ៏សម្រាប់ប្រើប្រាស់ថ្នាំញៀនមួយចំនួនទៀតផងដែរ ។

ប្រភពដដែលបន្ដថា ជនសង្ស័យទាំង២នាក់ខាងលើនេះ គឺជាមុខសញ្ញាជួញដូរថ្នាំញៀនយ៉ាងសកម្មនៅក្នុងភូមិសាស្រ្ដឃុំក្រាំងម្កាក់ ដែលសមត្ថកិច្ចបានកំណត់ជាយូរមកហើយ ។ លុះមកដល់វេលាម៉ោងប្រមាណជាង១១ ថ្ងៃទី៧ ខែឆ្នាំកើតហេតុខាងលើ សមត្ថកិច្ចបានទទួលព័ត៌មានច្បាស់ការថា ជនសង្ស័យខាងលើកំពុងធ្វើសកម្មភាពជួញដូរដោយខុសច្បាប់នូវសារធាតុញៀន ភ្លាមនោះសមត្ថកិច្ចក៏ស្រុកក៏បានធ្វើការសហការជាមួយកម្លាំងនគរបាលប៉ុស្ដិ៍រដ្ឋបាលក្រាំងម្កាក់ ចុះទៅដល់កន្លែងកើតហេតុ  រួចបានឃើញជនសង្ស័យឈ្មោះ សរ  ចិត្រា ហៅប៉ៅ ភ្លាមនោះកម្លាំងនគរបាលក៏បានឆែកត្រួតពិនិត្យឃើញមានថ្នាំញៀន១កញ្ចប់មធ្យម នៅនឹងខ្លួន រួចធ្វើការសាកសួរ ។

នៅចំពោះមុខសមត្ថកិច្ចជនសង្ស័យឈ្មោះ សរ ចិត្រា ហៅប៉ៅ បានសារភាពថា ថ្នាំញៀននេះខ្លួនបានទិញពីជនម្នាក់នៅផ្ទះរបស់ឈ្មោះ ចាន់ ណាហៅស្គូល នៅភូមិព្រៃខ្លា ឃុំក្រាំម្កាក់ ខណៈនោះសមត្ថកិច្ចក៏បានបន្ដទៅផ្ទះជនសង្ស័យឈ្មោះ យ៉ែម ចាន់ណា រួចធ្វើការឆែកឆេរបានរកឃើញថ្នាំញៀនចំនួន១កញ្ចប់មធ្យមបន្ថែមទៀត ។

បច្ចុប្បន្ន ជនសង្ស័យទាំង២នាក់ ត្រូវបាននគរបាលបញ្ជូនមកកាន់អធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ៕ស្អាងជ័យ