ភ្នំពេញ៖ យ៉ាងហោចណាស់មានមនុស្ស៣នាក់បានរងរបួសធ្ងន់ ដោយសារហេតុការណ៍គ្រោះថ្នាក់ចរាចរណ៍មួយ ដែលបង្កឡើងដោយម៉ូតូមួយគ្រឿង ដែលអ្នកបើកបរខ្វះការប្រុងប្រយ័ត្នបើកក្នុងល្បឿនលឿន ជ្រុលទៅបុកកង់ ។
បង្កការភ្ញាក់ផ្អើលកាលពីវេលាម៉ោង៥ និង១៥នាទីរសៀល ថ្ងៃទី២២ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ១ ត្រង់ចំណុចគីឡូម៉ែត្រលេខ៣១-៣២ ស្ថិតក្នុងភូមិ កណ្ដាល ឃុំបន្ទាយដែក ស្រុកកៀនស្វាយ ខេត្តកណ្ដាល។
ប្រភពព័ត៌មានបានឲ្យដឹងថា អ្នករងគ្រោះទាំង៣នាក់ រួមមានអ្នកបើកបរម៉ូតូឈ្មោះ សុត ចិន ភេទ ប្រុស អាយុ ២២ឆ្នាំ និងអ្នករួមដំណើរជាមួយម្នាក់ឈ្មោះ រិន ឌី ភេទ ប្រុស អាយុ១៩ឆ្នាំ អ្នកទាំងពីរមានទីលំនៅភូមិកណ្តាលក្រោម ឃុំបន្ទាយដែក ស្រុកកៀនស្វាយ ខេត្តកណ្តាល និងអ្នកជិះកង់ ឈ្មោះ សេក បូ ភេទប្រុស អាយុ៤៦ឆ្នាំ មានទីលំនៅក្នុងភូមិ-ឃុំកើតហេតុ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញម៉ូតូMSXខាងលើ ដែលជិះគ្នា២នាក់ តាមបណ្ដោយផ្លូវជាតិលេខ១ ក្នុងទិសពីពីអ្នកលឿងឆ្ពោះទៅភ្នំពេញ ក្នុងល្បឿនលឿន។ លុះមកដល់ចំណុចកើតហេតុ ម៉ូតូខាងលើក៏បានជ្រុលចង្កូតទៅបុកកង់ ដែលកំពុងតែជិះក្នុងទិសដៅស្រមគ្នា បណ្ដាលឲ្យដួលរងរបួសធ្ងន់ទាំង៣នាក់។
ក្រោយកើតហេតុ សមត្ថកិច្ចជំនាញក៏ចអន្តរាគមន៍ និងបានបញ្ជូនអ្នករបួសទាំង៣នាក់ទៅកាន់មន្ទីរពេទ្យនៅរាជធានីភ្នំពេញ។ ចំណែកម៉ូតូនិងកង់ត្រូវបានយកទៅរក្សាទុកនៅអធិការដ្ឋាននគរបាលស្រុកកៀនស្វាយ ដើម្បីដោះស្រាយនៅពេលក្រោយ៕
ដោយ៖ វិបុល
